Blu:sens, eBay e Idealista.com, no Congreso de AJE Galicia que comeza este xoves

O evento contará coa presenza de Ana Díaz, do portal de poxas eBay

Este xoves 30 de xuño abre as súas portas no Centro Social de Novacaixagalicia de Vigo a cuarta edición do Congreso Internacional de AJE Galicia, un encontro que contará coa presenza de máis de 330 empresarios e directivos de España e Portugal, todos eles directa ou indirectamente ligados ao fenómeno da Sociedade da Información. A citra, que dará comezo ás 10.30 e proseguirá logo cun acto oficial de apertura no que participará o alcalde de Vigo, Abel Caballero, xirará máis que nunca arredor das redes e das posibilidades que nos ofrecen en materia de posta en marcha dun negocio ou ben na mellora dos que xa están en activo. Esta disposición cara ao dixital tamén se deixará notar na propia feitura do congreso, máis que nunca unha comunidade social 2.0, tal e como se desprende do epígrafe desta edición: Networking: creando redes.
Polo evento, que ficará aberto ao longo de dous días, tamén achegarán os seus puntos de vista de Emilio Duró (a quen puidemos ver hai pouco nas xornadas sobre liderado do CPEIG en Santiago), José Ballesteros de la Puerta (experto en desenvolvemento persoal e innovación), Jesús Encinar (Idealista.com), Ana Díaz Sacristán (eBay) ou Juan Carlos Vez (da firma galega Blu:sens).
Amais disto e en virtude dun acordo de colaboración asinado entre AJE Galicia e a Universidade de Vigo, o evento achegará unha mesa redonda dedicada ao emprendemento e a consolidación de empresas, na que falarán, entre outros, Luis Bonet (presidente do Grupo Freixenet) e Elías Pérez (xerente de Quobis Networks).
O devandito acordo, segundo contan dende a organización, tamén prevé a creación dun comité mixto que se encargará de seleccionar, entre os estudantes que se presenten ao Premio Joven Empresario (na categoría de Emprendedor), a tres universitarios “que poderán charlar cara a cara cun dos tres relatores máis destacados do programa”.
Como evento paralelo ao Congreso, celebrarase a I Xornada de Oferta e Demanda Tecnolóxica da comunidade, que ten como obxectivo “abrir un espazo de encontro no que as empresas poidan detectar oportunidades de colaboración e negocios baseados no desenvolvemento tecnolóxico”.