Brother sorprende cunha nova impresora multifunción 3.0
luns, 28 de xaneiro do 2013
A compañía xaponesa
Brother, especializada en
equipamento ofimático para a empresa e para o fogar, está a
presentar estes días o seu novo equipo da gama Print 3.0, o modelo
MFC-J4410DW,
un produto multifunción que, segundo
nos contan dende o blog da empresa compostelá Foga, que a
distribúe en liña, resulta “totalmente innovador”, tanto
por vantaxes (máis calidade, menores custes) como por deseño
externo.
Sobre este último punto,
o aparello multifunción
salienta por unha feitura pouco convencional neste tipo de máquinas,
aparentemente máis un centro multimedia ca unha impresora, cousa que
se intensifica pola súa disposición compacta e, tamén, pola
inclusión dunha pantalla LC táctil de 4,5 centímetros con panel
electroestático.
A
todo o devandito, cómpre engadir as melloras que a compañía
Brother asegura ter incluído a longo de tódolos elos da cadea
tecnolóxica da impresión: calidade, tempos, fiabilidade ou custes.
Asemade,
permite imprimir de xeito ocasional en formato A3.
Outro dos seus puntos fortes de cara ao seu emprego na oficina,
informa a empresa, radica na posibilidade de efectuar impresións sen
fíos dende dispositivos móbiles, ademais de posibilitar a conexión
directa con aplicacións de Internet para a suba ou a descarga de
arquivos imprimíbeis. A
impresora sae ao mercado, distribuída pola devandita firma galega, a
un prezo de 133 euros sen IVE.