CLUSAGA e Siemens mostran como dixitalizar a nosa industria alimentaria
xoves, 19 de xaneiro do 2023
Os
fondos europeos NextGenerationEU, que darán impulso á
transformación dixital do sector alimentario en Galicia, centraron
parte da xornada organizada este xoves 19 de xaneiro por Siemens e a
Agrupación industrial Alimentaria de Galicia (CLUSAGA)
no Edificio FEUGA de Santiago. Estas axudas europeas, segundo
explicou Xosé Ramón Vázquez, responsábel da oficina técnica Next
Generation Galicia Food en CLUSAGA, supoñen “un investimento
público que fomenta o desenvolvemento, a transformación dixital e a
modernización do sector”.
Siemens
acudiu á xornada logo de ter presentado as súas tecnoloxías máis
innovadoras na recente convocatoria do PERTE, como o seu Xemelgo
Dixital, a súa Automatización Avanzada, as súas contribucións á
Intelixencia Artificial e as súas novas solucións en materia de
rastrexabilidade (trazabilidade) con sistemas MES e tecnoloxía
de cadea de bloques (blockchain). Estes recursos “están
enfocados cara a unha fabricación máis competitiva, que asegure o
control e a monitoraxe dos produtos e reduza o impacto ambiental dos
procesos”, segundo explicaron Manuel Cadenas, de Siemens Digital
Industries, e Sergio Ballesteros, de Siemens Digital Industries
Software.
O
evento foi inaugurado por Roberto Alonso, director de CLUSAGA, que
destacou “o reto da transformación dixital e a Industria 4.0 como
desafío estratéxico para o sector alimentario galego”; e polo
director rexional de Siemens en Galicia, Óscar Brea, que explicou a
capacidade de consultoría industrial de Siemens Advanta.
A
xornada tamén incluíu unha mesa redonda na que CONGALSA, CEAMSA e
Grupo Leche Río (este último, representada a través da consultora
Medrar), debullaron os seus principais retos e obxectivos e
describiron como se están a apoiar na dixitalización para abordar a
súa transformación tecnolóxica. Na charla tamén se trataron
aspectos cruciais para a industria agroalimentaria como a
ciberseguridade ou o papel que debe xogar o talento dixital.