Centum recibe a visita de David Regades e confirma a súa vindeira presenza en EE UU
luns, 10 de abril do 2023
O delegado de Zona Franca, David Regades, visitou
a semana pasada a sede da empresa viguesa Centum,
especializada en proxectos avanzados de tecnoloxía para a
comunicación e enxeñaría do sinal (por exemplo LifeSeeker, sistema
electrónico deseñado baixo estándares aeronáuticos que converte
os teléfonos baixo a súa área de actuación en radiobalizas,
permitindo así detectalos, identificalos, localizalos e mesmo se
comunicar con eles). A
visita de Regades coincidiu cunha boa nova para para a empresa
galega: a autorización para comercializar no mercado de Estados
Unidos.
A compañía viguesa instalada no edificio CITEXVI
do Campus da Uvigo está participada por VigoActivo.
O seu sistema de localización de persoas
desaparecidas, Lifeseeker, xa acumula máis de cen casos de éxito en
máis de 25 usuarios finais, só no último ano.
David Regades estivo acompañado polo director
executivo (CEO) da empresa, Héctor Estévez. Centum Research &
Technology, forma parte do grupo Centum, fundado en 2010 co obxectivo
de deseñar, desenvolver e comercializar sistemas aeronáuticos de
misión para os mercados de emerxencias, seguridade, defensa e
aeroespacial.
Crea solucións tecnolóxicas que maximizan a
eficiencia en operacións como procura e rescate, vixilancia
marítima, loita contra incendios, comunicacións de emerxencia ou
control de fronteiras. A compañía conta con 45 empregados dos que
un 35% son mulleres
Segundo se puxo de manifesto na visita de Regades,
Lifeseeker é o “buque insignia” da empresa. Trátase, máis en
detalle, dun sistema aeronáutico de localización de teléfonos
móbiles para atopar a persoas desaparecidas a través da
xeolocalización do seu teléfono móbil, mesmo en áreas sen
cobertura. Lifeseeker baséase nunha simple premisa: o teléfono
móbil é a baliza máis estendida do mundo e aproveita isto para
converter estes dispositivos en balizas de emerxencia capaces de
guiar aos equipos de rescate a unha localización exacta.