Chega a España a Apple SIM para facilitar a contratación de plans de datos no estranxeiro

venres, 3 de xullo do 2015 Marcus Fernández

Coa chegada do iPad Air 2 a compañía da mazá estreou tarxetas nano SIM programables, que permitían a elección de operador dende a tableta, sen ter que ir a unha tenda de telefonía móbil para contratar o servizo ou mudar de operador, o que provocou bastantes problemas, pola resistencia dos operadores a tal nivel de liberdade á hora de contratar os seus servizos (especialmente de cara ao seu abandono) polo que Apple reorientou o xeito de promocionar tal funcionalidade, e a Apple SIM chega a España como unha solución para contratar tarifas de datos cando esteamos no estranxeiro.
Deste xeito, os usuarios que teñan un iPad Air 2 ou un iPad mini 3 nas súas versións con conectividade móbil, poden agora contratar plans de datos en máis de 90 países, a través dos operadores EE, T-Mobiles e GigSky, sendo precisamente esta última a que permite contratar plans de datos internacionais de 3, 7, 14 e 30 días a uns prezos que podemos comentar na súa páxina web. Por exemplo, no Reino Unido (e moitos outros países europeos) por 10 euros teriamos 75 MB de datos móbiles durante 3 días, e por 50 euros teriamos 3 GB de datos durante 30 días, mentres que polo mesmo prezo nos EE.UU. os datos baixarían a 40 MB e 1 GB respectivamente.
Estamos así a falar dunha solución que pode resultar cómoda para usuarios que viaxen moito e non queiran complicacións á hora de contratar unha tarifa de datos local ocasional, pois claramente non é un servizo competitivo en prezo.

PUBLICIDADE