Chega á nosa terra o primeiro Campionato de Modelado 3D de Precisión con Móbil

De dereita a esquerda, Juan Ortiz, Santiago Moreno, Juan Casares e Juan Viaño (Foto: Alfonso SERVIMAV)

Dende a USC, co apoio da Fundación Vodafone, anuncian a celebración do primeiro Campionato de España de Modelado 3D de Precisión con móbil. Promover o enxeño científico do alumnado de 4º da ESO e bacharelato é a meta desta proposta. Así nolo confirmaba a sinatura de dous acordos celebrada pasado venres 16 de novembro por parte do reitor da USC Juan Casares e do director xeral da Fundación Vodafone España, Santiago Moreno. Con este campionato -proxecto pioneiro da USC financiado pola Fundación Española para a Ciencia e a Tecnoloxía (FECYT)- quérese tamén dar a coñecer o manexo das TIC e a telefonía móbil mediante unha técnica chamada fotogrametría, coa que se poden obter modelos 3D da realidade partindo de fotografías tiradas coa cámara do móbil mediante un programa informático.
E que é iso dos modelos 3D de precisión? Segundo verbas do profesor Juan Ortiz -director do proxecto- “son figuras virtuais que representan fielmente a realidade e que teñen múltiples aplicacións como, por exemplo, a medición en deportes como a F1 ou o ciclismo, a creación de efectos especiais ou a conservación do patrimonio cultural”. Emporiso con este campionato búscase simular e estimular a capacidade investigadora dos escolares mediante unha competición por equipos que desenvolverán modelos 3D virtuais a escala usando instrumental moi familiar para eles como o teléfono móbil, un ordenador persoal e o web.
Cómpre sinalar a outra banda que atinxe a este dobre convenio que atinxe á renovación de Estalmat (nos cursos 2012-2013 e 2013-2014), un programa que persegue detectar, estimular e orientar, ao longo de dous cursos, o talento matemático excepcional duns 25 estudantes (de 12 e 13 anos) mediante unha orientación semanal con actividades especialmente programadas para eles. Engadir que o proxecto ESTALMAT-Galicia comezou a implantarse en 2007 pilotado pola Facultade de Matemáticas da USC.