Chega en decembro a terceira edición do curso de auto-coñecemento de Vitae Consultores

mércores, 16 de novembro do 2022 S. P.

Vitae Consultores, a través da súa aula virtual, vai ofrecer este mes de decembro a terceira edición dunha actividade formativa na que todos os elementos teóricos e prácticos están dispostos para axudarnos a ser mellores profesionais e atopar o camiño máis axeitado para desenvolver o noso talento e a nosa capacitación. Trátase do curso Auto-coñecemento do Perfil Profesional. Serán quince horas de formación a desenvolver os días 12, 14, 15, 19 e 20 de decembro.
O obxectivo concreto do curso é subministrarnos recursos para exercer a nosa carreira profesional do mellor xeito posíbel, con completo coñecemento das nosas capacidades e con metodoloxías que nos axuden a xerar o mellor ambiente e as máximas eficacia, eficiencia e rendibilidade.
Segundo explican dende Vitae máis en detalle, “un dos problemas máis frecuentes en calquera carreira profesional é que non se nos capacita coas ferramentas psicolóxicas básicas para coñecernos a nós mesmos, pois ninguén nos formou para iso”. Neste senso, indican dende a consultora, o primeiro paso como profesionais e para traballar cun equipo ou lideralo é “o auto coñecemento, é dicir, coñecernos a nós mesmos facilitará a compresión do noso perfil profesional e dos perfís profesionais diferentes ao noso, o que mellorará a comunicación e a colaboración, xa que entenderanse as intencións e motivacións reais das persoas coas que traballamos, diminuíndo os conflitos debidos a unha incorrecta interpretación na comunicación cos compañeiros e compañeiras”.
En definitiva, no curso proporcionaranse as ferramentas para o auto coñecemento e ter unha perspectiva baseada na ciencia para orientar na elección dun camiño profesional e traballar en equipo.
O curso virá da man de Marcos Carbonell, profesional con máis de tres décadas de experiencia nos sectores do deporte, as novas tecnoloxías e os recursos humanos. Carbonell é diplomado en Empresariais, máster en Recursos Humanos e posgrao en Marketing e en Organización de Empresas. Dende 2006 é socio director de Vitae Consultores e tense responsabilizado, directa ou indirectamente, de máis de 1.000 procesos de selección cunha taxa de máis dun 90% de éxito.

PUBLICIDADE