Chega este novembro Utopía Noroeste, o encontro galego sobre as tecnoloxías que nos axudarán a superar a crise da COVID
martes, 17 de novembro do 2020
Vigo
e Ourense acollen esta semana o evento Utopía Noroeste, congreso de
innovación, tecnoloxía e ideas disruptivas que ten como obxectivo
principal “reflexionar sobre as innovacións e os cambios que
deixou a pandemia, e como teremos que enfrontarnos a eles dunha
maneira sustentábel”. O dito congreso arrinca en Vigo este xoves
19 cun encontro en formato mixto (presencial e virtual) aberto ao
público, onde poderemos escoitar en directo a algúns dos maiores
especialistas do ámbito estatal en Realidade Virtual, Intelixencia
Artificial, estándar 5G, videoxogos e Cidades Intelixentes. Quen
queira participar no evento, que conta co Grupo Código Cero (Código
Cero e O Barbanza) na súa
longa listaxe de colaboradores, pode formalizar libremente a súa
inscrición na páxina web www.utopianoroeste.com,
que será a canle de comunicación dos ditos expertos coa súa
audiencia.
Segundo
informa a organización do congreso a respecto das motivacións do
evento, Galicia ten “grandes posibilidades de desenvolvemento
dentro do novo marco económico que se abre a partir das innovacións
tecnolóxicas e os abruptos cambios que trouxo a crise da COVID,
moitos dos cales parecen chegar para quedar... Por este motivo a
relación co territorio vai estar moi presente nas charlas, con
reflexións sobre como converter o rural nunha oportunidade, grazas á
tecnoloxía e como adaptarse a estes cambios”.
O
congreso Utopía Noroeste está co-financiado pola Xunta de Galicia
dentro do programa de promoción de turismo MICE e a Deputación de
Ourense, dentro da súa estratexia de futuro, Provincia Intelixente.
A
xornada inaugural do xoves 19 celebrarase no Museo
do Mar de Galicia, en Vigo, arrincando cunha intervención sobre
sistemas con capacidade de análise e pensamento da man de José
María Lasalle, escritor e profesor universitario, autor do recente
ensaio Ciberleviatán. Tamén se reflexionará sobre as
estratexias de innovación nos contidos dixitais coa disertación de
Adriana Moscoso, directora xeral de Industrias Culturais, Propiedade
Intelectual e Cooperación do Ministerio de Cultura, e sobre Cidades
Intelixentes, coas reflexións de Manuel Baltar, oresidente da
Deputación de Ourense. Jaime García Cantero, director de contidos
do Foro Retina (El País), porá o peche a esta xornada de debate,
cunha charla sobre as tendencias tecnolóxicas que veñen. Ademais a
nova compositora viguesa Max foi convidada a interpretar algunhas das
súas novas composicións.
- Juan Rivas, Manuel Baltar e Nava Castro na presentación virtual do congreso
O
venres 20 o congreso trasládase ao Pazo de
Vilamarín en Ourense onde os protagonistas serán os videoxogos. O
seu perfil máis creativo estará presente cunha charla sobre a
música nos videoxogos, na que o produtor musical Denis Siks contará
a súa experiencia sobre a creación de música para empresas de
videoxogos internacionais, desde o seu estudo en Cangas do Morrazo. E
tamén a xornada servirá de marco para a presentación do Libro
Branco Español de Desarrolladores de Videojuegos, por parte de
Antonio Fernández. Este documento é unha edición especial que
contén un informe para contextualizar o panorama da industria do
videoxogo en Galicia e as tendencias de futuro. E con esa mirada de
futuro, entregaranse por primeira vez os premios da categoría de
Creación de Videoxogos, unha área incorporada como novidade nesta
edición 2020 aos Premios Xuventude Crea, programa desenvolvido desde
hai 10 anos pola Consellería de Política Social da Xunta de Galicia
para premiar o talento de persoas novas creativas galegas. Cristina
Pichel, directora xeral de Xuventude, Participación e Voluntariado,
dará a coñecer os proxectos da mocidade premiada. A xornada do
venres complétase coa intervención de Edgar Martín Blas,
responsábel de Virtual Voyagers, onde analizará o futuro máis
inmediato da Realidade Virtual.
A
sesión final do sábado 21 arrincará cunha charla
sobre moda e adaptación aos cambios, co testemuño de Amalia
Formoso, responsábel da firma de moda Zurita, quen desde China
explicará como a súa empresa se adaptou ás novas tecnoloxías.
A
vicerreitora da Universidade de Vigo Natalia Caparrini reflexionará
sobre as carreiras de futuro e a fenda de xénero nas denominadas
STEAM (siglas en inglés de ciencia, tecnoloxía, enxeñaría, arte e
matemáticas) e María Rodriguez e Edo Sadikovic (responsábeis do
espazo de traballo colaborativo Sende, emprazado nunha aldea do
Xurés) achegarán unha visión moi persoal sobre os nómades
dixitais. Pola súa banda, Fernando Suarez, presidente do Colexio
Profesional de Enxeñaría en Informática de Galicia e do Consello
Xeral de Colexios de Enxeñeiros Informáticos, disertará sobre
Ourense como provincia intelixente e o turismo do futuro. Tamén
haberá un espazo para o debate sobre a implementación do 5G, con
Luis Álvarez Sestelo, presidente da asociación galega de empresas
tecnolóxicas Ineo e a xestión integral a través da visualización
avanzada será obxecto de análise por parte de Manuel Meijide,
experto en Smart Cities e Industria 4.0, quen desenvolverá
na súa intervención o concepto do “xemelgo dixital”. Esta
primeira edición finalizará coas reflexións sobre emprendemento
tecnolóxico de Carlos Blanco, emprendedor e investidor no sector das
novas tecnoloxías.