Cilenis dálle pulo ao galego na Rede cunha ferramenta para conxugar os verbos

Falar galego é algo que resulta doado para as persoas que amamos esta lingua e que a sentimos e a falamos co corazón como nos ensinaron os nosos antergos; porén, mesmo aqueles que mamamos esta lingua dende o ventre da nosa nai cometemos erros ao escribir e ao comunicarnos formalmente con ela, e a maior parte deses erros proveñen dos fallos ortográficos e da mala conxugación das formas verbais. E se nos costa traballo conxugar os verbos coñecidos, que non faremos cos verbos que aínda non recollen os dicionarios como o recente tuitear? Pois a solución a isto, como din os seus creadores, “está na Rede”, onde atopa acubillo o CilenisConxugador, unha ferramenta en liña para conxugar automaticamente os verbos en galego.
A plataforma chega ós nosos equipos da man da empresa galega Cilenis, creada no seo da USC para ofrecer solucións innovadoras nos ámbitos do procesamento da linguaxe natural e a enxeñaría lingüística, que a ofrece de balde.
Segundo afirman, o CilenisConxugador “é a aplicación máis completa, fiable e versátil existente para conxugar de maneira automática calquera verbo en lingua galega” que permite conxugar os verbos que forman parte do Vocabulario Ortográfico da Lingua Galega (VOLG) e tamén calquera outro verbo que se nos ocorra, ben sexan neoloxismos, tecnicismos, localismos, verbos dunha xerga ou mesmo inventados.
O conxugador está baseado no sistema de código aberto conshuga, desenvolvido na Universidade de Santiago de Compostela polo grupo de grupo de investigación ProLNat@GE (Grupo para o Procesamento da Linguaxe Natural), do que procede o equipo de traballo de Cilenis. O resultado é, tal como din, “unha ferramenta con importantes aplicacións no ámbito da educación, a comunicación e a empresa”.

Dispoñible tamén en portugués

Asemade, dados os lazos de unión que o galego ten co portugués, este equipo de desenvolvedores non podía deixar de facer a versión de seu para a lingua curmá, e conxuntamente coa versión galega, Cilenis desenvolveu un conxugador verbal en portugués, dispoñible xa para os máis de 240 millóns de falantes desta lingua no mundo.
A empresa galega sitúase así “en primeira liña na creación de ferramentas lingüísticas on line no ámbito lusófono cunha ferramenta que mellora as existentes ata agora”, afirman.
O CilenisConjugador permite consultar verbos nas catro variantes do portugués: portugués europeo e portugués brasileiro, en cada caso antes e despois do acordo ortográfico. Tamén neste caso é posible optar por conxugar infinitivos presentes nos léxicos portugueses e brasileiros ou facelo con calquera verbo, mesmo inventado.
Esta empresa, que por certo levou o primeiro premio no XI Concurso de Proxectos Empresariais Innovadores da USC, celebrado este ano, traballa agora en novas aplicacións, como o buscador CilenisSearch, a partir do cal desenvolve buscadores personalizados segundo as necesidades dos clientes, par conseguir unha alta calidade dos resultados.