Comeza a segunda convocatoria do Fondo de Proxectos Culturais Xacobeo 2021
luns, 8 de marzo do 2021
Román
Rodríguez, o conselleiro de Cultura, Educación e Universidade,
presentou a segunda convocatoria do Fondo de Proxectos Culturais
Xacobeo 2021. O
programa, que conta cun investimento de 3 millóns de euros, está
impulsado pola Xunta (a
través da Consellería de Cultura e Educación e da súa Secretaría
Xeral de Política Lingüística)
e encádrase no eixo do Plan de Reactivación Cultural. O
obxectivo principal desta iniciativa é apoiar
ao tecido cultural e inxectar liquidez nas empresas, ademais de
configurar unha oferta en galego, ampla, plural e de calidade. Outro
dos cometidos do fondo é encher as redes de contidos culturais e
creativos na nosa lingua, unha liña de actividade que colleu novos
folgos coa chegada da pandemia.
Así,
o titular de Cultura sinalou que “isto continuará funcionando como
un dos piares básicos da reactivación cultural” e explicou que
“na primeira convocatoria programáronse a través deste fondo
preto de 400 actuacións escénicas ou musicais”.
En
xeral, o que se pretende é dar a posibilidade a profesionais e
empresas galegas de traballar e producir os seus proxectos en
condicións especiais sen ter que deixalos aparcados. Doutra banda, é
preciso facilitar o acceso á cultura a toda a cidadanía, co fin de
que poidan gozar das distintas expresións tanto en liña como de
xeito presencial.
Cómpre
mencionar que nesta nova convocatoria incrementarase o orzamento
asignado, de tal forma que se investirán 500.000 euros máis ca
outros anos. A súa vez, aumentará a axuda dos beneficiarios,
pasando de 10.000€ a 15.000€ no caso de empresas, cooperativas e
autónomos. Outra das novidades é a diminución nos prazos de
presentación.
O
prazo para participar na edición comezará o próximo luns e estará
vixente un mes. Poderán participar todas as ramas do sector
cultural, xa sexa con proxectos presenciais, virtuais, materiais ou
coa combinación de varias opcións.