Comeza a súa andaina o proxecto Smart Camiño
luns, 21 de marzo do 2016
A
semana
que vimos de deixar atrás o presidente da Xunta, Alberto Núñez
Feijóo, presentou ante os medios a iniciativa Smart Camiño,
unha achega
tecnolóxico-turística destinada entre outras cousas a facilitar
pola vía das TIC (e da maneira máis inmediata e accesíbel) todo o
que podemos precisar (onde comer, onde durmir, que visitar) como
viaxeiros que chegamos a terras galegas. Ou ben como galegas e
galegos que queremos coñecer mellor a nosa terra, sendo os Camiños Xacobeos
os eixes que artellarán a nosa andaina. En palabras do presidente,
Smart Camiño “introducirá o Camiño na enciclopedia do futuro, a
rede de redes”.
O
titular da Xunta detallou que as actuacións de Smart
Camiño diríxense por unha banda á
extensión da rede Wi-Fi gratuíta ao 100% dos albergues, “un
compromiso adquirido que será unha realidade nos vindeiros meses”,
engadiu, salientando que a día de hoxe “o 84% da rede pública de
albergues conta xa con rede sen fíos de balde”. Por outra banda,
informou da posta en marcha dunha nova páxina web,
caminodesantiago.gal,
operativa dende xa, e dunha aplicación para o Camiño de Santiago,
que estará dispoñíbel desde mediados de abril.
Feijóo tamén destacou
o “papel fundamental” que desempeña o turismo na nosa economía
e a boa marcha que esta actividade está a ter nos últimos anos,
“supoñendo o 11,6% do nos produto interior bruto”. Tamén
recordou que o Goberno galego impulsou o
programa Smart Turismo 2015-2020, que
conta cun investimento de 10 millóns de euros e que abrangue no seu
seo a iniciativa Smart Camiño
“que iniciou hoxe a súa andaina”.