Comezan os encontros online da Deputación para relanzar o turismo lugués na desescalada
luns, 8 de xuño do 2020
Este
luns 8 de xuño, a Deputación de Lugo vai afondar nas “claves para
reactivar o turismo na provincia” agora que xa se asenta, coas súas
limitacións, o regreso da actividade do sector. Farao
a través do primeiro dos encontros online que programa a
entidade provincial co sector. A apertura do foro virtual, o
primeiro do ciclo Abrindo as portas: o rexurdir do turismo (En
Lugo, Si), virá da man do xefe de área de Turismo Sostible da
Secretaría de Estado de Turismo, Ricardo Blanco Portillo, e a
deputada de Turismo, Pilar García Porto. A xornada comeza este luns
ás 11.00 horas, cunha sesión sobre sustentabilidade e confianza
como elementos fundamentais para fortalecer Lugo como destino.
Retransmitirase
de balde, coa participación aberta a todo o público, a
través da canle en Youtube do Servizo de Audiovisuais da Deputación.
Nesta canle o público poderá formular preguntas e comentarios. As
persoas interesadas en participar poden escribir un correo
electrónico á conta turismo@deputacionlugo.org para recibir
indicacións directas do acceso.
Xornadas
Abrindo as portas: o rexurdir do turismo
Os
encontros de turismo online da institución provincial terán
continuidade noutras catro sesións máis os días 10, 11, 15 e 17 de
xuño co obxectivo de converterse nun “espazo de intercambio de
información, análise e debate de opinións e tamén de escoita das
necesidades do sector e das súas perspectivas sobre a reactivación
turística da provincia”. Con esta iniciativa, a Deputación
pretende facilitar a adaptación con garantías a todo o que esixe a
nova normalidade na actividade hostaleira e turística e compartir a
visión dos retos e oportunidades que ofrece o novo escenario para o
sector.
Nestes
foros virtuais do turismo reuniranse representantes dunha vintena de
asociacións de profesionais e de empresas, da sociedade civil, de
entidades que traballan polo desenvolvemento do sector e de
organismos oficiais con competencias no turismo.
As
xornadas Abrindo as portas: o rexurdir do turismo son unha das
accións da campaña En Lugo, Si, que promove a institución
provincial para impulsar o tecido económico na desescalada.
Pretenden “contribuír a incorporar ferramentas e dinámicas que
sirvan para reforzar os valores e fortalezas da provincia de Lugo
como destino turístico e para afrontar con garantías a chegada de
visitantes neste verán”.
Participantes
nos encontros de turismo online
Todos
os foros de turismo online comezarán ás 11:00 horas e
contarán coa participación da Deputada de Turismo, Pilar García
Porto. O mércores 10 de xuño, no diálogo con representantes de
colectivos empresariais intervirán as asociacións galegas de
Albergues Privados -AGALBER-, de Axencias de Viaxes – AGAVI-, de
Empresas de Turismo Activo e de Natureza – AGETAN-, xunto ás
asociacións provinciais de Empresarios de Hostalería de Lugo
–APEHL-, e de Guías de Turismo de Galicia -APIT GALICIA-.
O
xoves 11 de xuño, no diálogo con representantes de institucións,
entes de xestión e promoción e sociedade civil intervirán a
alcaldesa de Lugo, Lara Méndez, o presidente do Consorcio de Turismo
da Ribeira Sacra, Luis Fernández Guitián, o presidente da
Federación Galega de Municipios e Provincias, Alberto Varela Paz, o
presidente da Mancomunidade de Municipios da Mariña Lucense,
Francisco Cajoto, a delegada da S.A. do Plan Xacobeo e Comisaria do
Xacobeo 2021, Cecilia Pereira, o presidente da Federación Veciñal
Lucus Augusti, Jesús Vázquez Varela, e o presidente da Asociación
Galega de Amigos do Camiño de Santiago, Manuel López Vázquez.
O
luns 15 de xuño, noutro diálogo con colectivos empresariais
participarán representantes da Asociación de Vivendas Turísticas
de Galicia -AVITURGA-, Asociación de Balnearios de Galicia,
Federación Galega de Comercio, Federación Galega de Turismo Rural e
Asociación de Profesionais do Turismo de Galicia -PROTURGA-.
O
mércores 17 de xuño, no debate Traballando por unha hostalería
segura intervirán representantes da Asociación Provincial de
Empresarios de Hostalería de Lugo -APEHL-, Hostelería de España e
da Horeca Data e Proyecto Hostelería Segura.
