Consideran legal nos EE.UU. facer jailbreak aos móbiles

Proceso de liberación dun iPhone

Coa chegada dos smartphones chegou un novo sistema de liberación de móbiles que, en vez de desligalos da súa operadora de telecomunicacións, permiten a manipulación total do seu software para, por exemplo, instalar aplicacións non autorizadas polo seu fabricante. Esta práctica coñécese coma jailbreak (especialmente no caso do iPhone) ou facer root no caso de móbiles con Android, e aínda que pode servir para piratear aplicacións, o feito de que sirva para evitar o veto de aplicacións coma é habitual en compañías coma Apple serviu para que nos EE.UU. a Biblioteca do Congreso (encargada de supervisar a Oficina do Copyright) ditaminase a petición da EFF (Fundación Fronteiras Electrónicas) que non supón unha infracción da Digital Millennium Copyright Act (DMCA). Tamén consideran lícito que os consumidores liberen os seus móbiles do operador a través do que o adquirisen, así coma o feito de extraer vídeo de películas en DVD para a produción de obras sen ánimo de lucro ou cando non se violen os dereitos de autor (considerándose coma un mal necesario o feito de ter que violar a protección DRM dos discos orixinais).
Aínda que moitos estean a asegurar que esta decisión da Biblioteca do Congreso supón que facer jailbreak a un móbil non afectaría á súa garantía, non parece ser algo totalmente correcto, e dende Apple xa advirten que, aínda que non sexa ilegal modificar o software dos seus móbiles, consideran que viola o contrato de garantía dos seus produtos, ou sexa, que a legalidade do jailbreak non parece ter ningún efecto práctico para os usuarios (pois tampouco estaban a ter lugar denuncias por parte das compañías por facer tal).