CreaAPPcuentos, a ferramenta viguesa para a creación de contos infantís, gaña o Pirate Startup Award

Startup Pirates organizou os días pasados un concurso de startups vía web, no que premiar ao proxecto máis votado con dúas prazas para a vindeira edición do Startup Tour de Berlín (valoradas en 1.000 euros), e o proxecto que finalmente acadou a primeira posición, o máis votado, foi o proxecto galego creAPPcuentos. A devandita iniciativa vén da man de Avelino Correa e Maribel Martínez (coa colaboración de ilustradores como Pepe Carreiro, Alberto García Ariza, Abraham Carreiro, Raquel López, Pirusca...) e consiste nunha aplicación para dispositivos con Android e iOS que permitirá a creación de contos ou historias dun xeito sinxelo e intuitivo, converténdose nunha interesante ferramenta para pais que gocen de inventar historias para os seus fillos e queiran adaptalas a cada situación concreta que vivan os cativos.
CreAPPcuentos tamén podería ser de interese para o seu uso no ámbito escolar, empregándoa como ferramenta educativa.
Para a parte máis técnica do desenvolvemento desta aplicación, CreAPPcuentos decidiu contar coa compañía Pumpún Dixital (que vén a ser a versión empresarial de Escoitar.org, proxecto do que temos falado en numerosas ocasións en Código Cero) e que está a encargarse de facer que este proxecto chegue en breve en forma de aplicación para tablets.