Efectivos da Policía Local e do Grupo de Emerxencias de Ribeira fórmanse nas posibilidades dos drons para os rescates
luns, 20 de xullo do 2020
Os
técnicos da empresa Aerocamaras,
con sede en Ourense e especializada e innovadores usos para os
vehículos aéreos non tripulados, amais de en formación e
desenvolvemento de drons, levaron a cabo este luns 20 de xullo un
simulacro de salvamento con este tipo de dispositivos na praia de
Coroso de Ribeira. A
experiencia foi un complemento formativo para efectivos da Policía
Local e do Grupo de Apoio e Emerxencias Municipais (GAEM): oito
traballadores locais que os días pasados foron quen de superar as
probas teóricas e prácticas no manexo de drons e que este luns
tiveron a oportunidade de dar un importante paso práctico da man da
devandita empresa.
En
concreto, cinco efectivos do Grupo de Apoio e Emerxencias Municipal
(GAEM) e tres axentes da Policía Local levaron a cabo unha xornada
práctica que este martes 21 terá unha segunda quenda de
desenvolvemento.
Segundo
informou o Concello, a empresa tecnolóxica vai fornecer ao Concello
de dous vehículos aéreos non tripulados para levar a cabo
“múltiples funcións”. Por exemplo: controlar que non se
produzan aglomeracións nas praias, contar con recursos de apoio en
rescates acuáticos, buscar persoas desaparecidas, localizar de
niños de avespas velutinas ou detectar focos de lumes forestais,
entre outras aplicacións.
O
simulacro deste luns 20 consistiu na recreación do rescate dunha
persoa en altura (simulando que estabsa atrapada nunha roca) mentres
que mañá está previsto realizar un rescate acuático e procurar
unha persoa desaparecida. Unha vez cumprimentado este apartado
formativo, agárdase que nos vindeiros días os dous drons mercados
polo Concello xa poidan estar operativos.