En marcha USC-Integra, novo programa de incubación de proxectos centrados nas tecnoloxías emerxentes

A Cátedra INCIBE de Ciberseguridade lanzou este mes de abril, coa colaboración da Área de Valorización, Transferencia e Emprendemento, o novo Programa USC-Integra, iniciativa de incubación destinada impulsar proxectos emprendedores e de transferencia emerxentes que integren tecnoloxías avanzadas como a a Intelixencia Artificial (IA), a Internet das Cousas (IoT), a análise da información a gran escala (Big Data), a robótica ou a cadea de bloques (blockchain), primando as propostas que inclúan un plan de ciberseguridade.
Segundo explican fontes da USC, a iniciativa destaca “polo seu enfoque integral e interdisciplinario, ofrecendo financiamento e apoio estratéxico para o desenvolvemento e consolidación dos proxectos desde a súa fase inicial ata a súa saída ao mercado”.
USC-Integra diríxese á comunidade universitaria da USC que desenvolva solucións innovadoras en calquera área de coñecemento, e de xeito especial ao persoal investigador interesado en transferir coñecemento ao mercado, ao alumnado con inquedanzas emprendedoras no ámbito das tecnoloxías emerxentes e a persoas egresadas recentes, que busquen desenvolver un proxecto empresarial innovador.
As candidaturas, que poden presentarse ata o 11 de maio, serán avaliadas por un panel composto por persoas expertas en tecnoloxía, negocios e ciberseguridade.