En marcha unha web para a achegarnos aos acontecementos que acubillou o Castelo da Rocha Forte de Santiago

Os días pasados tivemos ocasión de coñecer mellor unha das xoias patrimoniais máis esquecidas de Santiago, en parte polo desleixo das administracións (que pouco teñen feito para reivindicalo e amosarllo como se merece á cidadanía), en parte porque non se trata dun edificio que chegase a nós tal como foi (foi tirado abaixo nas revoltas irmandiñas) e que estea emprazado nun escenario ideal para a súa visita (por alí a poucos metros pasa unha estrada, a que une Santiago con Milladoiro, que anima ben pouco a deixarnos caer por alí). Falamos da antiga fortaleza medieval da Rocha Forte. E falamos tamén da web rochaforte.info, unha boa oportunidade para despexarmos dúbidas sobre o que foi un dos grandes edificios representativos de Compostela.
A páxina ao servizo de público en xeral e seareiros e profesionais da investigación histórica e arqueolóxica, foi desenvolvida pola empresa A Navalla Suíza e impulsada polo Concello de Santiago co obxectivo de promover o castelo e a contorna dende o punto de vista patrimonial e tamén turístico. A web, un produto ben sorprendente polos elementos que xunta (ten ingredientes de xogo, de cómic e de produto de animación, e non desaproveita ningunha das oportunidades didácticas e lúdicas que se lle brindan para sorprender ao internauta con todo o relacionado co castelo, que dá para moito), acompáñase coa publicación dun libro, Rochaforte, que está a disposición da cidadanía nos centros socioculturais composteláns e que tamén se pode descargar da dita web. O Concello investiu nestas iniciativas de promoción 53.000 euros, os cales insírense nun orzamento integral de 1 millón de euros achegado polo Ministerio de Educación. A web artéllase en catro elementos básicos: Historias (a través do cal podemos visitar o castelo e dar conta das estancias e dos obxectos, personaxes e acontecementos que ten acubillado), Mapas (temos acceso a percorrido histórico polos recantos do castelo), Biblioteca e O Proxecto. Esta última parte inclúe datos de tipo técnico encamiñados a facilitar os traballos históricos relacionados coa fortaleza.