Entrevista ao blogueiro Francis Pisani en La Voz de Galicia

Hai días nos que atopar novas que non falen da crise, do paro, da burbulla inmobiliaria ou doutros temas que non fan máis que estragarnos o día pola súa carga de negatividade, é case unha misión imposible; e aínda moito máis se o que queremos é estar ao día no tocante ao que se coce en torno ás novas tecnoloxías pois a tarefa complícase aínda moito máis se cabe, posto que estes temas non interesan tanto como as vitorias de Nadal, o transcorrer da liga de fútbol ou a visita de Sarkozy e máis da súa bela señora a España. Porén desta volta, tivemos algo máis de sorte e non puidemos evitar un sorriso de satisfacción ao decatarnos que o xornal dixital La Voz de Galicia vén de publicar unha entrevista ao renomeado blogueiro Francis Pisani, o que xa é coñecido como o “gurú das novas tecnoloxías”.
Este xornalista e escritor nacido en París en 1942, vén de publicar A alquimia das multitudes. Cómo a web está a cambiar o mundo (Paidós), unha estrea que coincide co 20 aniversario da web e co xurdimento dunha nova revolución “na que os internautas se veñen de converter en protagonistas”.
Así definen no xornal galego á nova era na que a Rede é o medio de comunicación por antonomasia, unha ferramenta que Pisani defende fronte aos que din que “é o peor, que é unha renuncia á individualidade e que se trata dunha especie de maoísmo dixital”. Nembargantes, o autor tamén argumenta motivos en contra dos que cren que “a Rede é perfecta”, asegurando que, “hai que recoñecerlle as súas grandes virtudes, pero tamén os seus riscos”.
A entrevista prosegue coa definición, por parte do blogueiro, do substantivo webactores, unha verba que non fai máis que definir o que é hoxe en día un internauta activo nas redes sociais, onde se convirte en produtor dos seus propios contidos.
Pisani tamén cita os principais riscos de Internet, as vantaxes de ferramentas como a Wikipedia, ou a expansión das redes sociais e, en concreto, refírese a Facebook pola polémica xurdida en torno á intención da mesma de ser “dona” dos datos que os usuarios poñían nos seus perfís, algo que enfadou notablemente á comunidade intenauta.