Epic Games estrea tenda de aplicacións para móbiles

Os creadores de Fortnite, tras ser expulsados da App Store, iniciaron unha batalla legal contra Apple, que na Unión Europea saldouse no seu favor, polo que procederon non só a preparar o seu retorno a iOS, senón que estableceron toda unha estratexia baseada nunha tenda de aplicacións para móbiles propia que, tras superar os atrancos postos por Apple, ve hoxe a luz.

Fall Guys, por fin en móbiles

A nova tenda de aplicacións de Epic Games para móbiles está a agora dispoñible para dispositivos con Android de todo o mundo e paro os iPhone situados na Unión Europea, permitindo aos usuarios que instalen a nova aplicación non só instalar o célebre Fortnite, senón contar tamén con outros títulos de éxito, como Fall Guys, que está a celebrar a súa estrea para dispositivos móbiles, onde pretende replicar o éxito que tivera no seu lanzamento para ordenadores e consolas en 2020.

Apertura a máis tendas

Outro xogo que tamén está dispoñible na nova tenda de aplicacións é Rocket League Sideswipe, lanzado en 2021, e que aínda está presente nas tendas de aplicacións para móbiles de Apple e Google, o que parece que vai durar, xa que a estratexia de Epic Games parece estar en levar aos seus xogos ao público en todas as tendas nas que sexa posible e, de feito, anuncian que os usuarios de iOS na Unión Europea poderán gozar dos seus xogos a través da AltStore PAL, tenda que até o momento precisaba dunha subscrición de pagamento, pero que pasará a ser de balde grazas ao apoio económico de Epic. Tamén está prevista a chegada dos xogos de Epic a Aptoide en iOS e a ONE Store en Android.

ACTUALIZACIÓN: Aínda que Epic terá unha política aberta de cara a tendas alternativas, non parece ser tan receptivo coas tendas dominantes, e anuncian que Rocket League Sideswipe abandonará a tenda de Google Play o vindeiro 23 de agosto, polo que os usuarios que queiran seguir a gozar do xogo deben borralo do seu dispositivo e descargalo novamente da nova tenda de Epic Games.