Esta semana entréganse os premios do concurso de ideas do novo edificio do CITIC na Cidade das TIC

Este mércores 15 de decembro celebrarase na Coruña a xornada de entrega de premios do concurso de ideas de arquitectura convocado pola UDC para o novo edificio do CITIC na Cidade das TIC, o proxecto estratéxico para crear un polo TIC e de innovación dixital a través da conversión da antiga Fábrica de Armas nun gran espazo de coñecemento avanzado e emprendemento.
No acto intervirán representantes das principais entidades que apoian a iniciativa da Cidade das TIC, entre os que atoparán o reitor da UDC, Julio Abalde, o conselleiro de Economía da Xunta, Francisco Conde, e o concelleiro de Urbanismo da Coruña, Juan Manuel Díaz Villoslada. Tamén participarán na cita a vicerreitora de Infraestruturas e Sustentabilidade da UDC, Amparo Casares, e o director do CITIC, Manuel F. González Penedo.
No evento, os diferentes equipos gañadores presentarán os proxectos premiados e, ademais, poderán contemplarse as maquetas dos mesmos no hall do CITIC.
O novo edificio do CITIC situarase nos terreos da antiga Fábrica de Armas da Coruña como centro I+D+i e nodo de Intelixencia Artificial, ofrecendo ademais formación especializada nestes ámbitos. Serén palabras do Centro de Investigación TIC, “un elemento arquitectónico relevante que representará á Universidade e que priorizará a condición sustentábel do edificio e a súa contorna”.
No concurso de ideas convocado pola UDC recibíronse preto dunha vintena de propostas de gran calidade, entre as que o xurado elixiu os tres primeiros premios e un accésit. Entregaranse un total de 37.000 € en premios: 20.000 € para o primeiro premio, 10.000 € para o segundo e 7.000 € para o terceiro.
O primeiro premio foi para o proxecto GAIA0101, proposto polo equipo integrado por Guadalupe Piñera, Jesús Irisarri, Enrique Blanco, Patricia Sabín e Joaquín Martín. Constitúese como “un espazo multiuso colectivo de transferencia do coñecemento, un fito de beleza cúbica e alta funcionalidade no que prima a sustentabilidade e no que se integran arquitectura, cidade e natureza”.
TICA0021, desenvolvido por Santiago Barge en colaboración con Belén Bouza e Guillermo Lozano obtivo o segundo premio. Trátase dunha intervención de impacto ambiental mínimo a través da superposición dunha trama abstracta, un elemento estrutural de madeira laminada.
Pola súa banda, FITO2022, de Alejandro Rodríguez en colaboración con María Mera e Martín Álvarez, acadou o terceiro premio, propoñendo “un entorno ordenado no que se estende a paisaxe cara ao interior do edificio”.
Finalmente, o xurado concedeu un accésit a CTIC2030, de Gustavo Figueira en colaboración con Diego Díaz e Javier Pombar, que presentaron “un proxecto flexíbel de espazos diáfanos nun elemento altamente recoñecido na paisaxe”.