Este sábado temos unha nova cita nas Pontes coa impresión 3D
martes, 21 de xaneiro do 2020
Co
inicio do ano volve coller o impulso o espírito argalleiro galego
envorcado nas novas (e colaborativas) formas de facer tecnoloxía.
Pola banda das Pontes, a Asociación Amigus infórmanos de que xa
está convocada, para este sábado 25, unha nova edición dos seus
Amigus Labs. O plan de
traballo é o seguinte: ao abeiro desta nova quedada maker,
darase continuidade á montaxe da impresora 3D de gran formato
comezada en anteriores quedadas, para o que se contará (este sábado)
coa axuda de Álvaro Rey, da comunidade MakerGal.
A
xuntanza deste 25 de xaneiro preséntase como unha boa oportunidade
para coñecermos os detalles dunha impresora 3D de envergadura, como
funciona, como se monta e de que partes se compón cada unha das súas
pezas.
A
cita completarase cunha xornada de portas abertas, ideal para as
argalleiras e argalleiros que queiran coñecer como funcionan os Fab
Lab de Amigus, as actividades que se programan ou que maneiras
existen de colaborar.
A
asociación tamén quere facer saber que neste punto de inflexión
entre 2019 e 2020 déuselle un importante impulso ás capacidades do
obradoiro, que foi obxecto de medre e optimización: dende o mes de
decembro estase a traballar na electrónica da cortadora CNC e na
montaxe, como dixemos, de impresoras de gran formato.
Para
asistir á cita deste sábado só é necesario que reservemos a nosa
praza enviando un correo electrónico á conta amigus@amiguslabs.org
(o horario é de 10:00 a 14:00 en Amigus Labs na Praza do Hospital nº
14, As Pontes).