Filtran as credenciais de máis de 100 millóns de usuarios de VK.com

O número de filtracións masivas de datos persoais de plataformas de redes sociais comeza a ser alarmante, xa que, aínda que mudemos o noso contrasinal das mesmas, expoñen certa información que pode facilitar a nosa suplantación en moitos outros sistemas, sendo a última plataforma social da que dan conta da aparición masiva de datos persoais na Rede a de VK.com, considerada como “o Facebook ruso”, e que moitos recoñecen por ser o xermolo de Telegram.
Dende LeakedSource rexistraron 100.544.934 entradas nas que figuran o correo electrónico, o nome, o apelido, a localización, o número de teléfono, o contrasinal e, algún caso, un segundo enderezo de correo electrónico de usuarios de VKontakte, polo que os usuarios deste servizo deberían mudar o seu contrasinal de verse afectados pola filtración, así como ter en conta os datos filtrados á hora de asegurar outras contas en liña que teñan.
Como curiosidade, os datos que figuran na listaxe filtrada confirman unha vez máis que os usuarios teñen moi pouco coidado á hora de elixir os seus contrasinais, e 709.067 usuarios de VK.com terían empregado como contrasinal 123456, mentres que 416.591 optarían por 123456789 e 291.645 por qwerty, dando a entender que prefiren a comodidade dun contrasinal sinxelo que a dificultade cunha clave segura, de aí que resulte doado entender por que moitos fabricantes están a apostar por integrar en ordenadores e smartphones lectores de pegadas dixitais (simplemente buscan que sexa doado ter un mínimo nivel de seguridade).