FreedomPop eliminará o seu plan de balde

mércores, 21 de marzo do 2018 Marcus Fernández

En 2016 chegou a España FreedomPop, un operador móbil virtual que ofrecía chamadas de balde no seu plan máis básico, para o que inicialmente empregaba VoIP, aínda que un ano despois evolucionou para ofrecer chamadas de voz tradicionais, o que non foi dabondo para que esta atractiva oferta de telefonía móbil de balde trunfase no noso territorio, de aí que resultase inevitable o cambio nas condicións do servizo, abandonando definitivamente o modelo freemium e incrementando de paso as súas tarifas.
Ao parecer, estes días algúns usuarios de FreedomPop xa están a recibir comunicacións por correo electrónico indicándolles os cambios no servizo, que supón que no mes de maio desaparecerá o plan de balde, que ofrecía 100 minutos en chamadas, 200 MB de datos e 300 mensaxes de texto por 0 euros/mes, pasando o relevo a un plan Esencial que coas mesmas condicións custará 2,99 euros/mes, dicindo adeus ao principal reclamo de FreedomPop.
O resto de tarifas de FreedomPop tamén experimentarán cambios e, por exemplo, o plan 2GB Premium, con chamadas e mensaxes sen límite e 2 GB de datos pasará de 8,99 euros/mes a 10,99 euros/mes.
O sorprendente deste futuro cambio de tarifas é que aínda hoxe FreedomPop está a promocionarse como unha compañía de «telefonía móbil e 100% gratis (..) Sen contratos. Sen trucos. Sen complicacións. E para sempre!», o que podería traer problemas á compañía cos clientes actuais, xa que estariamos ante un claro caso de publicidade enganosa.

PUBLICIDADE