Gemini 3 Pro está dispoñible en galego

Google deu hoxe un novo salto na súa estratexia de intelixencia artificial coa presentación oficial de Gemini 3, a terceira xeración da familia de modelos coa que a compañía quere consolidar unha nova era de produtos e servizos baseados na IA. O anuncio realizárono Sundar Pichai, CEO de Google e Alphabet, e Demis Hassabis e Koray Kavukcuoglu, responsables de Google DeepMind, que sitúan Gemini 3 como o modelo máis potente da compañía tanto en razoamento como en capacidades multimodais.
O ecosistema de Gemini leva dous anos medrando a gran velocidade: a colaboración con funcións de IA na Vista Creada con IA chega xa a dous mil millóns de usuarios ao mes, a aplicación de Gemini supera os 650 millóns de usuarios mensuais, máis do 70 % dos clientes de Google Cloud empregan a súa IA e trece millóns de desenvolvedores levan creado solucións con modelos xerativos da compañía. Gemini 3 quere dar continuidade a esa traxectoria ofrecendo máis potencia, máis contexto e unha integración máis profunda nos produtos de Google.

Un modelo deseñado para «entender o ambiente»

Gemini 3 preséntase como o modelo máis intelixente de Google, pensado para mellorar o razoamento profundo e captar matices complexos, tanto en tarefas creativas como na resolución de problemas. A compañía subliña que o novo modelo é máis capaz de interpretar o contexto e a intención detrás das peticións, co obxectivo de que os usuarios precisen menos mensaxes para chegar ao resultado que buscan.
A evolución é continuísta respecto das xeracións anteriores: Gemini 1 ampliou os tipos e volumes de información que se podían procesar, Gemini 2 puxo o foco nas capacidades axénticas e no razoamento avanzado, e Gemini 2.5 Pro chegou a liderar durante máis de seis meses a clasificación independente de LMArena. Agora, Gemini 3 toma esa base e combina todas as funcións nun modelo orientado a «dar vida a calquera idea».
Na parte técnica, Google asegura que Gemini 3 Pro supera con marxe a 2.5 Pro nas principais probas comparativas de IA, tanto en texto como en imaxe e vídeo. Entre os indicadores que cita están melloras en exames de razoamento a nivel doutoral, novos récords en probas de matemática avanzada e puntuacións de referencia en avaliacións multimodais como MMMU-Pro ou Video-MMMU. Tamén se destaca un salto en precisión factual en SimpleQA Verified, o que debería traducirse en respostas máis fiables.

Multimodal, con contexto masivo e dispoñible en galego

Gemini 3 nace, como o resto da familia, cun enfoque plenamente multimodal: é quen de combinar texto, imaxes, vídeo, audio e código nun mesmo fluxo de traballo. A isto engádese unha xanela de contexto dun millón de tokens, pensada para que o modelo poida traballar con grandes volumes de información, como artigos científicos completos, clases en vídeo ou longas cadeas de correos.
Google ilustra estas capacidades con exemplos como a dixitalización e tradución de receitas familiares escritas a man para crear un libro de cociña, a xeración de materiais interactivos de estudo a partir de documentación técnica ou a análise de vídeos deportivos para detectar aspectos mellorables e propoñer plans de adestramento personalizados.
Unha das novidades máis relevantes para o Estado español é que Gemini 3 Pro chega en versión preliminar dispoñible en trinta novos idiomas, entre eles o galego, así como o catalán e o éuscaro. O modelo intégrase nun conxunto de produtos de Google para que se poida empregar no día a día para aprender, crear e planificar.

Ampla integración

Co lanzamento de hoxe, Google comeza a levar Gemini 3 «á escala de Google». O modelo pasa a alimentar o Modo IA do buscador de Google, incluíndo novas experiencias dinámicas e deseños xerativos máis visuais que se constrúen ao instante segundo a consulta. É a primeira vez que unha nova xeración de Gemini entra no buscador desde o primeiro día.
Gemini 3 tamén está dispoñible desde hoxe na aplicación de Gemini, en AI Studio, en Vertex AI e na nova plataforma de desenvolvemento de axentes Google Antigravity. Para os usuarios profesionais, a compañía destaca que o modelo é especialmente forte en xeración de código e en programación autónoma, liderando probas como WebDev Arena e mellorando os resultados en bancos de referencia como Terminal-Bench 2.0 ou SWE-bench Verified. Ademais, intégrase xa en ferramentas de terceiros como Cursor, GitHub, JetBrains, Manus ou Replit.

Google Antigravity: unha nova plataforma centrada en axentes

A outra gran peza do anuncio é Google Antigravity, unha nova plataforma de desenvolvemento baseada en axentes que quere redefinir a forma na que traballan os programadores coa IA. A idea de Google é que, grazas ás capacidades de razoamento, uso de ferramentas e programación autónoma de Gemini 3, a IA pase de ser unha simple axuda dentro do IDE a converterse nun socio activo na construción de software.
Antigravity ofrece unha experiencia de desenvolvemento familiar, pero cun espazo propio para os axentes, que teñen acceso directo ao editor de código, ao terminal e ao navegador. Deste xeito, poden planificar e executar tarefas complexas de desenvolvemento de principio a fin, validando o seu propio código mentres interactúan co contorno. A plataforma está estreitamente ligada a Gemini 3 Pro, ao modelo Gemini 2.5 para uso en ordenador (capaz de controlar o navegador) e ao modelo de edición de imaxes Nano Banana (Gemini 2.5 Image).

Axentes máis capaces para planificar a longo prazo

A dimensión axéntica é outro dos piares de Gemini 3. Google explica que, desde a presentación da chamada era dos axentes con Gemini 2, centrou parte dos seus esforzos en mellorar a planificación a longo prazo e a capacidade do modelo para manter un uso coherente de ferramentas.
Como exemplo, a compañía destaca os resultados de Gemini 3 Pro en Vending-Bench, unha proba que simula a xestión dun negocio de máquinas expendedoras durante un ano. O modelo é quen de manter decisións consistentes, maximizar beneficios e non desviarse da tarefa. Traducido ao día a día, isto supón que Gemini 3 pode asumir fluxos de traballo máis longos e complexos, como ordenar unha bandexa de entrada de Gmail ou planificar unha viaxe completa, sempre baixo supervisión do usuario.
Os subscritores de Google AI Ultra poden probar xa estas capacidades a través de Gemini Agent na app de Gemini, e Google avanzou que irá levando estas funcións a máis produtos nos próximos meses.

Deep Think, o modo de pensamento profundo, chegará máis adiante

Xunto con Gemini 3 Pro, Google presentou tamén Gemini 3 Deep Think, un modo de uso que leva aínda máis lonxe as capacidades de razoamento e comprensión multimodal. Nas probas internas, Deep Think mellora as xa altas puntuacións de Gemini 3 Pro en exames como Humanity’s Last Exam ou GPQA Diamond e acada un resultado sen precedentes en ARC-AGI, un banco de probas deseñado para medir a capacidade de resolver retos novos.
Porén, este modo non estará dispoñible de inmediato para o público xeral. Google tomará máis tempo para realizar avaliacións de seguridade adicionais e recoller comentarios de testers especializados antes de ofrecelo aos subscritores de Google AI Ultra nas próximas semanas.

Dispoñibilidade e vindeiros pasos

Desde hoxe, Gemini 3 está dispoñible para os usuarios da app de Gemini e para as persoas subscritas a Google AI Pro e Ultra no Modo IA da Busca. Os desenvolvedores poden acceder ao modelo a través da API de Gemini en AI Studio, da CLI de Gemini e da plataforma Google Antigravity, mentres que as empresas poden facelo mediante Vertex AI e Gemini Enterprise.
Google avanza que nas vindeiras semanas e meses lanzará máis modelos da serie Gemini 3, co obxectivo de ampliar aínda máis o abanico de tarefas que se poden abordar coa IA. A compañía anima os usuarios a probar as novas funcións e a compartir a súa experiencia para seguir depurando esta nova xeración de ferramentas de intelixencia artificial.