Gestamp leva a tecnoloxía galega de CO2 Smart Tech ás súas plantas de norteamérica
luns, 14 de xaneiro do 2019
A
epresa galega CO2 Smart Tech, con sede en Oleiros e especializada en
tecnoloxías intelixentes para acadarmos a meirande eficiencia
enerxética, formalizou un importante acordo con Gestamp, compañía
referente a nivel internacional en materia de fabricación de
compoñentes de metal para o eido do automóbil. Gestamp decantouse
pola experiencia e innovación da firma galega para a xestión
enerxética das súas plantas en México e Estados Unidos, onde está
a aplicar, como ferramenta estándar de xestión de recursos, o
sistema de monitoraxe de enerxía co2st-tem.
Este xa está en marcha en dúas sedes de Gestamp nos dous ditos
países. A previsión é abranguer outras 10 plantas máis.
A
finalidade da compañía do metal é, ante todo, reducir o seu
consumo enerxético ao tempo que obtén meirande marxe de eficiencia
nas súas liñas de produción, grazas á integración dos parámetros
de produción no sistema. O obxectivo final, segundo informa CO2
Smart Tech, é modelar o comportamento dos equipos para que traballen
da maneira máis sustentábel posíbel, “ofrecendo información de
gran valor para a toma de decisións por parte dos responsables de
cada planta”.
A
tecnoloxía co2st-tem, un avanzado software cloud de
seguimento da enerxía en tempo real, permitirá optimizar o consumo
nas plantas de Gestamp, ademais de ofrecer información fundamental
no mantemento das instalacións, con vistas a predicir os mellores
comportamentos e optimizar os procesos de produción.
Por
certo que amais de todo o devandito, o sistema co2st-tem inclúe
aplicacións móbiles específicas para tabletas que, sincronizadas
cunha aplicación na nube, permiten actuar sobre as instalacións de
xeito remoto. Ou sexa, que lle posibilitarán a Gestamp traballar
intelixentemente cos consumos e custes de subministros de auga,
electricidade e gas mediante unha software de dispoñíbel e operábel
na nube.