Gigabyte presenta a gráfica GTX 1080 máis cativa do mercado

martes, 5 de setembro do 2017 Marcus Fernández

As novas tarxetas gráficas capaz de mover gráficos con elevado nivel de detalle e impresionantes resolucións, así como mundos en realidade virtual, son normalmente de elevado tamaño e consumo, de aí que sorprenda especialmente a nova nVIDIA GeForce GTX 1080 de Gigagyte, que chega en formato Mini ITX, o que non lle impide integrar 8 GB de memoria GDDR5X e un ventilador de 90 milímetros.
Esta gráfica ten tamaño de só 16,9 centímetros, fronte aos 26,7 centímetros que teñen normalmente as GeForce GTX 1080, o que permite a súa integración en pequenos chasis (pensando principalmente no seu transporte) sen sacrificar rendemento, para o que integra un sistema de disipación de calor feito a medida. De feito, incluso esta gráfica ousa incorporar a posibilidade de facer overclocking con só un clic na aplicación AORUS Graphics Engine, para que os xogadores máis intensivos poidan espremer a tope a súa gráfica sen ter que ter coñecementos sobre overclocking.
Esta nova gráfica funciona nunha rañura PCI-E 3.0 x 16, conta con saídas Dual-link DVI-D, HDMI e DisplayPort (3), soporta resolucións de até 7.680 x 4.320 píxeles e recoméndase que o equipo no que se instale teña unha fonte de alimentación de 500 watts como mínimo.
Polo momento non se coñece o seu prezo de venda nin a data na que estará dispoñible.

PUBLICIDADE