Google Maps incorpora información do estado do tráfico en España

Google Maps leva ofrecendo dende 2008 unha capa con información sobre o estado do tráfico en directo, que pouco a pouco foi espallándose polo mundo, e esta semana chega a 13 países europeos máis: Austria, Bélxica, República Checa, Dinamarca, Alemaña, Irlanda, Israel, Luxemburgo, Países Baixos, Polonia, Eslovaquia, Suíza e España. Esta cobertura inclúe a autoestradas e autovías, así como as grandes vías das principais cidades, aínda que nalgún caso a información é moito máis completa (cubrindo practicamente todas as rúas).
O máis relevante desta ampliación da capa de tráfico é que está dispoñible tanto na versión web de Google Maps, como nas ferramentas de mapas e navegación para móbiles, polo que non só mellora a súa utilidade nas viaxes, senón que pode ser dunha inestimable axuda para os desprazamentos diarios, instando a evitar retencións de tráfico.
A información na capa de tráfico actualízase cada 5-10 minutos, polo que resulta de grande utilidade como ferramenta para o tempo real, pero tamén é posible consultar o estado do tráfico nun día e nunha hora determinada, de xeito que ao planificar unha viaxe pode axudarnos a chegar ao noso destino no menor tempo posible sen que teñamos que coñecer os típicos atascos provocados habitualmente en saídas de zonas comerciais ou de polígonos empresariais, xa que o sistema de mapas teraos en conta ao buscar a ruta máis rápida.
Por desgraza, a información da capa de tráfico en Galicia aínda é moi limitada, cinguíndose ás grandes vías de comunicación.