Gradiant e Netex investiron máis de 2 millóns en innovación para o ámbito eLearning
xoves, 24 de outubro do 2019
O
Centro Tecolóxico Gradiant e
a empresa Netex,
centrada no fornecemento de aplicacións informáticas para favorecer
o ensino a distancia entre empresas e entidades académicas,
presentaron onte os resultados da súa iniciativa conxunta de
formación avanzada para profesionais. Estamos a falar da Unidade
Mixta de Investigación (UMI) Smart Lifelong Learning para a
Industria do Futuro e a Sociedade do Coñecemento, que, como o seu
propio nome indica, encamíñase a facilitar novos recursos
personalizados de adestramento para traballadoras e traballadores da
Industria 4.0. Os
datos foron achegados por Antía Fernández e Agustín Cañas,
codirectores de Sistemas Intelixentes de Gradiant; e José Ramón
Mosteiro, CTO de Netex. Segundo salientaron, a UMI xa investiu
máis de 2 millóns de euros en renovar o fondo e a forma do
eLearning.
Tamén
lembraron que o proxecto conxunto xurdiu coa arela de buscar novas
fórmulas para actualizar os coñecementos das persoas que traballan
en ámbitos tecnolóxicos, ámbitos en constante evolución e
transformación. A unidade mixta, formada por profesionais de ambas
as entidades, investigou ao longo de 3 anos o desenvolvemento de
ferramentas innovadoras para formación e avaliación do retorno do
investimento de proxectos educativos. En total, este proxecto contou
cun investimento de case 2,3 millóns de euros e un equipo de 55
profesionais de alta cualificación de Gradiant e Netex, e contou co
apoio da Axencia Galega de Innovación (GAIN), a través do Programa
Unidades Mixtas de Investigación 2016, e do Fondo Europeo de
Desenvolvemento Rexional (FEDER) no marco do Programa Operativo FEDER
Galicia 2014-2020.
Nun
plano máis detallado, Smart Lifelong Learning centrouse “nunha
estratexia intelixente de aprendizaxe”, empregando solucións de
analítica de datos para identificar problemas, xestionar o talento e
pór en marcha “aprendizaxes significativas” que poderían axudar
a minimizar o problema do fracaso escolar. “Só en Galicia,
colaborouse con máis de 250 centros educativos e participaron nos
pilotos máis 800 docentes e 11000 alumnos, de entre 10 e 12 anos”,
informaron os investigadores de Gradiant, salientando tamén o
importante periplo do proxecto polos principais eventos do mundo da
educación, como o BETT ou a Frankfurt Book Fair, entre outras citas
de primeira liña.
Tamén
destacaron a énfase posta na capacitación dos traballadores na
industria 4.0, fomentando o traballo centros de educación superior
(universidades e escolas de negocios) co fin de estudar “como as
solucións desta Unidade Mixta podían axudar a estas institucións a
superar o espazo que separa formación regulada das necesidades que
ten o mundo da empresa e como adaptar a formación das universidades,
aínda baseada en leccións presenciais e papel, a novos modelos
demandados polos traballadores da sociedade do coñecemento”. Este
traballo permitiu establecer reunións de traballo coa Stanford
University Graduate School of Business en EE.UU; e coa BPP University
en Reino Unido, entre outras entidades.
Os
investigadores tamén puxeron o foco no importante potencial da UMI
para dixitalizar as industrias creativas, reducindo os custos de
transformación tecnolóxica ao automatizar os procesos de
importación e o maquetado das actividades educativas. “Desta
maneira”, sinalaron, “grazas ao traballo desenvolvido no seo da
UMI é posíbel construír unha nova xeración de contidos con valor
diferencial para os usuarios, ao converter os contidos en autónomos
(independentes da plataforma educativa) e brindar servizos centrados
en información en tempo real, adaptabilidade, personalización,
colaboración e gamificación”.