Indra comprométese coa nosa formación profesional dual

venres, 20 de xullo do 2018 Fernando Sarasketa

Exterior das dependencias de Indra no Polígono da Grela na Coruña /Imaxe da Galipedia

Indra vai formar alumnado da Coruña e contorna achegándolle a posibilidade de facer prácticas nas súas dependencias. Así o veu de dar a coñecer a propia empresa (unha das grandes consultoras TIC do ámbito estatal, con forte presenza na nosa terra), trala sinatura dun acordo coa Consellería de Cultura e Educación para ampliar de maneira conxunta a oferta de formación profesional dual na contorna tecnolóxica da Coruña.
Máis en detalle, a través do acordo Indra traballará en dous novos ciclos educativos a desenvolver no IES Fernando Wirtz Suárez a partires do vindeiro curso 2018/19.
A alianza foi dada a coñecer polo conselleiro de Educación, Román Rodríguez, e o director de Captación de Talento Indra, Santiago Huertas.
A formalización do acordo, que lle serviu ao conselleiro para coñecer as instalacións coruñesas da empresa, implicará a incorporación ao dito centro de educación secundaria dos ciclos de grao superior en desenvolvemento de aplicacións multiplataforma e en desenvolvemento de aplicacións web, que suman un total de 24 prazas (a razón de 12 por cada un deles), e que terán unha duración de dous cursos.
Para quen non o saiba, o FP Dual é un modelo educativo innovador que permite que as alumnas e alumnos reciban formación teórica, por unha banda, e adestramento práctico e profesional na sede dunha empresa concreta relacionada coa especialidade a cursar. Deste xeito, conséguese que as empresas se impliquen tanto no propio currículo do ciclo coma na formación complementaria do estudante.
No caso do proxecto presentado hoxe, o alumnado combinará ao longo de dous cursos a docencia curricular no IES Fernando Wirtz Suárez coa complementaria que ofreza a compañía e estadías nas que realizarán “actividade profesionalizadora” nas instalacións de Indra na Coruña. En cada curso, os estudantes pasarán seis meses no CIFP e outros seis na empresa.
Asemade, a empresa comprométese a financiar o proxecto a través dun sistema de bolsas por un importe mínimo de 450 euros/mes durante os meses nos que a actividade formativa con vertente profesionalizadora se realice integramente nela. Así mesmo, os alumnos serán incorporados ao réxime xeral da Seguridade Social, e disporán dun mínimo de 30 días naturais de vacacións por curso.

PUBLICIDADE