Innovación habilitará rede sen fíos en 43 polígonos industriais

Os polígonos industriais galegos teñen que estar o máis preto posible da Rede. Mesmo dentro da Rede, con todo o que iso implica (por exemplo: que non haxa distinción entre o espazo físico dos mesmos e o espazo virtual). Esta é a idea básica dun proxecto presentado esta mañá pola Consellería de Innovación encamiñado a facer chegar a banda larga a estes complexos empresariais.
Máis polo miúdo, a iniciativa -que vén acompañada por un orzamento de 5 millóns de euros- permitirá habilitar o acceso á Internet sen fíos na práctica totalidade dos 43 polígonos que hoxe non contan con este recurso, segundo sinala a Consellería. Cómpre sinalar que na actualidade hai en Galiza un total de 130 recintos desta índole.
O proxecto desenvolverase en virtude a acordos de cooperación cos concellos, estando aberta a partir de hoxe (e ata o 11 de marzo) o prazo de solicitudes para a incorporación deste servizo naqueles espazos empresariais onde non estea habilitado ou non opere en boas condicións.
No acto de presentación deste proxecto tamén se fixo fincapé nos máis de 39 millóns de euros que están a ser destinados nas vilas galegas ó subministro de banda larga en xeral (non só nos polígonos) ó longo do período 2005-2008.
Segundo apunta Innovación, os accesos sen fíos nos recintos industriais constituirán un importante pulo á competitividade das empresas nos mercados.