Instagram ábrese ás compras móbiles
mércores, 2 de novembro do 2016
A
aplicación móbil de Instagram ten dende os seus inicios unha estrutura moi
pechada, na que limita enormemente as posibilidades de que os usuarios
abandonen a aplicación con restricións como non permitir ligazóns nas
publicacións, o que é todo un atranco para certo tipo de usos comerciais da
plataforma e ante o que veñen de reaccionar cunha nova funcionalidade que bota
a andar nos EE.UU. para un grupo reducido de compañÃas, pero que irase abrindo
paulatinamente e que consiste en que agora nas imaxes de Instagram non só
poderase etiquetar a persoas, senón que tamén será
posible etiquetar a obxectos á venda, de xeito que o usuario terá
facilidades á hora de adquirir un produto que está a ver en Instagram.
Polo momento só unhas poucas marcas norteamericanas (como Kate Spade,
JackThreads e Warby Parker) poden compartir publicacións que permitan gozar
destas novas etiquetas para produtos (até 5 por publicación) que poden levarnos
a unha ficha dos mesmos na que incluso será posible completar a súa compra na
tenda en liña do comerciante. Deste xeito, cando vexamos un produto que nos
interese xa non teremos que abandonar a aplicación de Instagram para buscalo,
senón que a propia ferramenta achegaranos información sobre o mesmo para
facilitar a súa adquisición ou, simplemente, aportar información que poida
resultar de interese para unha decisión de compra (podendo incluso gardar o
produto para tomar a decisión final máis adiante).
Esta nova funcionalidade abre unha importante fiestra ao comercio electrónico
dende o móbil e Instagram ofrecerá estas novas etiquetas de balde, ou sexa, que
Instagram non recibirá comisión por cada compra dentro da súa aplicación, senón
que simplemente confÃa en que estas novas posibilidades incrementen a publicidade
na súa ferramenta móbil.