Instagram facilita os directos dende o ordenador a creadores e empresas

Aínda que o habitual é facer directos de Instagram directamente dende o móbil, hai creadores e empresas que prefiren realizar retransmisións máis profesionais, e agora van ter máis doado dar ese paso, xa que os usuarios de Instagram que teñan perfil de empresa ou creador xa poden acceder de xeito xerar ao Instagram Live Producer.
Isto quere dicir que quen queira realizar retransmisións dende software específico como o célebre OBS, o que permite empregar varias cámaras, micrófonos externos e elementos gráficos, pode visitar dende o seu ordenador a versión web de Instagram, para alí crear unha retransmisión de vídeo en directo para a que se lle facilitarán as chaves de transmisión e os datos de configuración precisos para que funcionen as aplicacións que tan frecuentemente empregan os creadores de contido para plataformas como YouTube ou Twitch.
Cómpre salientar que para facer unha retransmisión digna en Instagram é recomendable (aínda que non imprescindible) cinguirse ao formato vertical, ou sexa, que recomendan configurar a aplicación de realización cunha resolución de imaxe de 720 x 1280 píxeles a 30 imaxes por segundo (aínda que acepta sen problemas 60 imaxes por segundo) cunha compresión de entre 2.250 e 6.000 Kbps, mentres que o son debe estar en estéreo a 44,1 KHz a un máximo de 256 Kbps.
Mentres se realiza a retransmisión de vídeo a través do software especializado, na versión web de Instagram teremos unha pestana na que poder ler e responder os comentarios dos espectadores, así como reportar os comentarios pouco axeitados e fixar os comentarios que queiramos destacar.
Unha vez rematado o directo pode optarse por compartir a retransmisión e incluso descargala.