Investigadores do CiTIUS crean o que sería o sistema máis preciso do mundo en interpretación de electrocardiogramas
xoves, 9 de febreiro do 2017
Os
investigadores
do centro CiTIUS, emprazado na Universidade de Santiago, veñen de
dar forma ao que sería, nas súas palabras, “o sistema automático
máis preciso do mundo para interpretar o electrocardiograma”.
O sistema, que melloraría polo tanto todos os recursos análogos que
están hoxe en día dispoñíbeis, xa está no punto de mira de
investigadores do senlleiro Massachusetts Institute of Technology
(MIT), un dos centros tecnolóxicos máis reputados do mundo. O MIT
empregou a tecnoloxía galega con rexistros reais de máis de 50.000
pacientes.
O
sistema desenvolvido nos laboratorios do CiTIUS pon un punto de
certeza, exactitude e eficacia na maré de información que
representa o historial cardiolóxico dunha persoa. Para facernos unha
idea do que representa, marca distancias importantes con respecto aos
sistemas automáticos actuais para a interpretación do
electrocardiograma (ECG), empregados en “áreas críticas” como
as Unidades de Coidados Intensivos (UCI) e incapaces, segundo
informan os investigadores do CiTIUS, de fornecer información exacta
e fiábel dos doentes aos cales fan seguimento. O motivo? A “escasa
ou nula capacidade para disociar os sinais identificados como ruído
da información principal”, sinalan, salientando que este feito
obriga aos facultativos a supervisar en persoa o proceso, cada pouco.
As
devanditas alteracións nos datos contidos no ECG, malia o moito
camiño avanzado ao longo destas tres últimas décadas en materia de
investigación, non foron aínda emendadas. Aí entra en xogo
precisamente a tecnoloxía desenvolvida dende o CiTIUS, (Centro
Singular de Investigación en Tecnoloxías da Información da
Universidade de Santiago de Compostela).
O
sistema, máis polo miúdo, parte da seguinte base: xa que se avanzou
tan pouco neste tempo, ao longo de diferentes vieiros, por que non
comezar dende o principio? Tendo en conta esta pregunta, os
investigadores galegos desenvolveron o que chaman o procedemento
Constrúe, un novo método para a interpretación de sinais
electrocardiográficos baseado “nun modelo de razoamento distinto
ao que se coñece como razoamento abdutivo”, informan, explicando
que este “consiste en considerar a interpretación do
electrocardiograma como un proceso de formación de conxecturas que
deberán ser verificadas a posteriori”. Na súa opinión, trátase
dunha “metodoloxía que vai alén da simple observación e que
permite interpretar ao xeito aqueles anacos afectados por ruído en
base ao seu contexto para minimizar de maneira moi relevante a cifra
de alarmas falas”. Os investigadores lembran a este respecto que
“as persoas facemos uso do razoamento abdutivo cando respondemos a
unha situación formulando hipóteses que poidan explicala da maneira
máis precisa posible”. En virtude disto é posíbel facer cousas
como, por exemplo, comprender unha conversa telefónica ruidosa. É
como se o contexto nos axudase a encher os posíbeis baleiros de
información.
O
novo método, desenvolvido polos investigadores do programa de
e-Saúde do CiTIUS Tomás Teijeiro, Paulo Félix, Jesús Presedo e
Daniel Castro, foi publicado na revista IEEE Journal of Biomedical
and Health Informatics. Tras validar a súa eficacia utilizando
unha base de datos de referencia, os autores do traballo comprobaron
que os seus resultados melloraban “de maneira substancial” as
prestacións de todos os sistemas automáticos dispoñíbeis até a
data, “mesmo comparábeis ás ofrecidas polos semi-automáticos, ou
sexa, os supervisados por un experto. O CiTIUS informa este respecto
que as análises “confirmaron axiña as potencialidades do
algoritmo, que xa deu lugar a varias colaboracións internacionais”.
A máis recente, a devandita co Broad Institute of MIT and Harvard.