Juan Naya: “Sabemos o que estamos facendo hoxe en materia tecnolóxica, pero mañá todo pode cambiar”
venres, 18 de marzo do 2022
O
mundo cambia e o mundo tecnolóxico ten aínda un ritmo máis
acelerado. Na consultora
Vitae, amais de adestrarnos no manexo das ferramentas de xestión,
análise de datos e comunicación máis avanzadas do panorama TIC,
tamén se nos mostra como permanecer en estado de continua
actualización. Dito doutro xeito: Vitae ponnos á par dos grandes
desenvolvementos tecnolóxicos na súa carreira cara a excelencia.
Nesta entrevista falamos con Juan Naya, formador de Vitae e encargado
de achegar aos nosos profesionais aos segredos de Power BI e DAX
avanzado, potentes ferramentas para o tratamento de datos no eido
empresarial.
-Vitae
Consultores é sen lugar a dúbidas un dos grandes referentes
tecnolóxico-formativos do ámbito galega e por suposto estatal. A
listaxe de cursos que ofrece é considerábel e todos eles son
convocados co nexo común de converter aos profesionais TIC en
mellores profesionais. Haberá outras portas nas que petar e outras
alternativas, pero se tivera vostede que destacar algúns puntos da
actividade de Vitae, que destacaría?
-Da
consultora Vitae destaca o seu coñecemento do sector, coma ben
apuntas, pois leva moitos anos dedicada á formación nas empresas
TIC. Destaca a súa inquietude por ofrecer formación de alto valor
engadido. Enfocada a impartir formacións dos máis diversos temas,
dende máis xenéricos até os temas máis específicos que poden
precisar os diferentes profesionais do sector. Teñen un labor non
somentes reactivo, senón que proactivo, propoñendo novas accións
ou camiños formativos. E, inda por enriba, sempre con profesionais
de primeiro nivel. Deberíamos salientar tamén, como non, o seu
valor humano, a súa implicación coas empresas e cos participantes
nos cursos. Sempre con eles no centro, para tratar de enfocar as
accións cara ás súas necesidades e requirimentos. Sempre con unha
actitude proactiva, propoñendo novas accións ou camiños
formativos.
-Podemos
ser bos profesionais TIC sen formarnos nin actualizar os nosos
coñecementos e habilidades?
-Se
hai tempo que se di que estamos na era da información, de nada
valerá se non vai da man dunha aceleración na formación e o
adestramento. Diría que estamos máis preto da era da aprendizaxe.
Sabemos o que estamos facendo hoxe, pero mañá todo pode cambiar.
Pode aparecer unha nova oportunidade, un novo produto. Temos que
estar capacitándonos de continuo. Afondando no que sabemos,
reciclándonos se é preciso, pero sempre coa vista posta ao noso
arredor. Aprendamos cousas novas cada día, aínda que non sexan
directamente do noso eido de acción, porque todo isto nos vai axudar
a medrar.
-Que
papel xoga vostede na nova oferta formativa de Vitae para o ano que
vén de comezar?
-O
meu labor é
organizar formacións na ferramenta de Microsoft Power BI, e
ferramentas de xestión da información. Hoxe en día
consumimos moita información de BBDD de ERP levándoas ao Excel. Esa
é a realidade. Pero hai máis cousas que se poden facer. Dun modo
ben ordenado, e seguindo os pasos adecuados, seremos capaces de ter a
información que cada vez teñen máis usuarios, que queren saber
utilizar, saber crear cadros de mando, informes que compartir, dun
modo moi potente, consistente e visual.
-Nun
plano máis específico, resúmanos o tipo de recursos que poñen en
xogo as ferramentas Power BI e Dax Avanzado para os nosos
profesionais e empresas TIC, ferramentas que vostede mostra como
utilizar a través da consultora Vitae...
-Power
BI é unha aposta moi potente de Microsoft para a xestión e
visualización da información. Ofrece posibilidades de conexión a
centos de orixes diferentes cos seus conectores. Permite preparar os
datos, modelalos e crear os cálculos que poidamos precisar para
visualizar a información demandada polo consumidor. Co consumidor de
informe no centro, deséñanse os informes que dean resposta as súas
preguntas de negocio. Esta información será sinxela de compartir e
consumir no diferentes dispositivos. Por suposto, pódese actualizar
a información de modo programado, crear alertas, etc. Pola súa
banda, DAX é a linguaxe coa que se realizan os cálculos no modelo.
É unha linguaxe de funcións, que pode ofrecer coma resultados
valores escalares, os clásicos que levaríamos a unha táboa
dinámica pero tamén táboas. De maneira que tamén é unha linguaxe
de consultas. Como din os grandes gurús do DAX, os italianos Marco
Russo e Alberto Ferrari: “DAX é simple, máis non é sinxelo”.
-Por
que son tan importantes e cruciais estas ferramentas para garantir o
éxito dun proxecto?
-Estas
ferramentas, ao tratar coa xestión e a visualización da información
das compañías rematan por ter unha gran importancia. Os cadros de
mando que se mostran, os paneis informativos que van consumir as
persoas da empresa e que serán fundamentais na toma de decisións da
compañía, dependen de que a información que se lles subministre
estea ben estruturada, e por suposto, que sexa certa.
-A
actividade que vostede desempeña en Vitae é sempre a mesma, sen
variacións, ou ten que estar suxeita ás variacións e
actualizacións das que é obxecto o panorama tecnolóxico
internacional?
-Power
BI lanza actualizacións case cada mes. É unha ferramenta moi aberta
á comunidade e o seu desenvolvemento é constante. Estas novidades
precisan de tempo para asimilar, incorporar na documentación das
formacións, preparación dos exemplos, adaptacións nos casos de
estudio, así como actualizacións dos proxectos desenvolvidos.
-Pode
un profesional do ámbito informático facer o mesmo curso sobre o
mesmo contido en diferentes ocasións? Recoméndase facelo?
-Como
dicía, os avances e os cambios son constantes nestas ferramentas e,
tamén, nas que están ao seu arredor. De modo que aínda que
quixésemos sería difícil dar dúas veces o mesmo curso. A
estrutura pode ser similar en moitos casos, pero os contidos, poden,
e deben ir mudando. As formacións en aberto levan un programa máis
específico, no que se trata de ensinar certas propiedades desa
ferramenta, casos nos que aplicar, solucións que imos obter, camiños
polos que seguir, recursos... Nos cursos que se preparan para
realizar in company sempre poden levar unha compoñente máis
ad-hoc, no programa e nos contidos. De modo que se enfoquen
máis a necesidades a resolver.
Hoxe
en día a especialización e o cariño cara ao cliente é o que che
axuda a marcar a diferenza, gañar a confianza dos clientes, que
queden satisfeitos, que aproveiten o aprendido e que queiran repetir
con novos contidos.