Lembran a Twitter que ten que cumprir coas leis europeas

Didier Reynders (Comisión Europea) con Karen White (Twitter) nas oficinas de Twitter en Dublín

Non conforme co rebumbio formado polo restablecemento da conta de Twitter de Donald Trump, Elon Musk repetiu a xogada con outra enquisa a través da que fixo oficial unha amnistía xeral ás contas suspendidas agás que estivesen involucradas en spam ou fosen ilegais, ou sexa, de devólvelle a voz ao peor de Twitter: usuarios que na meirande parte das ocasións promovían discursos de odio (algo que é ilegal, pero que non chegou a declararse así oficialmente xa que a plataforma expulsou aos usuarios ante as súas condutas tóxicas evidentes, evitando así que un tribunal puidese considerar á plataforma responsable por inacción), o que sen dúbida vai contribuír ao empeoramento da comunidade.
Resulta especialmente rechamante que se restauren contas de usuarios perigosos á vez que se reduce o número de traballadores que se encargan de moderar os contidos, o que provoca que as condutas contrarias ás normas de Twitter carezan de moderación efectiva, e algún informe chegue a estimar que só o 1% das mensaxes racistas publicadas en Twitter retíranse da plataforma tras ser denunciadas, o que confirma a grande carencia de moderadores humanos que hai actualmente.
A situación actual non parece que faia mudar rápido, xa que esta mesma semana sóubose que, aparte das numerosas renuncias que houbo a semana pasada, Musk tamén realizou ducias de despedimentos, e está a adoptar unha política de pagamentos bastante cuestionable (rexeita pagar a provedores e moitos outros gastos comprometidos antes da súa chegada á empresa, e insta aos traballadores a renegociar contratos para reducir custos).
Pero esta situación caótica non está a resultar allea para os reguladores, e o comisario europeo de Xustiza, Didier Reynders, xa tivo unha xuntanza con persoal de Twitter para lembrar á compañía que teñen que cumprir a lexislación europea evitando os discursos de odio, loitando contra a desinformación e exercendo certos labores de moderación que non parece que se estean a dar actualmente. De feito, é imposible que actualmente Twitter poida cumprir coa lexislación europea xa que despediu a todos os traballadores da súa oficina en Bruxelas, de xeito que non hai unha canle de interlocución efectiva entre as autoridades europeas e Twitter.
De continuar na mesma liña Twitter exponse a importantes sancións, que poderían ser simplemente económicas ou chegar a provocar o bloqueo de Twitter para os usuarios europeos, o que sería realmente dramático, polo que é de esperar que nas vindeiras semanas Musk recapacite e actúe con responsabilidade que debe aos usuarios.