Mateo Valero, director do Centro Nacional de Supercomputación, estará este venres no CiTIUS

xoves, 28 de outubro do 2021 S. P.

Mateo Valero, director do Centro Nacional de Supercomputación, impartirá este 29 de novembro unha conferencia no CiTIUS da Universidade de Santiago. A cita, organizada polo CiTIUS e o CESGA (Centro de Supercomputación de Galicia), comezará a partir das 12.30 horas. Segundo informan os dous centros, a charla permitirá “coñecer as últimas revolucións no eido da Computación de Altas Prestacións para acelerar o progreso científico”. Mateo Valero é o fundador e director do Barcelona Supercomputing Center e un dos maiores referentes no eido do cálculo de alto rendemento a nivel mundial.
Segundo informa o centro compostelán centrado en Intelixencia Artificial, ao longo da súa charla Mateo Valero resumirá a situación actual e as transformacións que se producirán no futuro próximo nos sistemas de computación de altas prestacións (HPC, polas súas siglas en inglés), incluíndo o seu forte impacto na investigación científica. Avaliaranse cuestións concretas como a computación masiva e as súas posibilidades para usar múltiples técnicas como as redes neuronais aplicadas a problemas do mundo real (dando lugar ao que chamamos Intelixencia Artificial, IA), ou tamén o potencial futuro da computación cuántica, baseada no uso dos fenómenos da mecánica cuántica para manipular a información. Todos estes avances, apunta o centro compostelán, poden axudar, ou nalgúns casos mesmo substituír, ás técnicas clásicas.
Sobre o relator
Mateo Valero é fundador e director do Barcelona Supercomputing Center. Profesor desde 1974 e catedrático en Arquitectura de Computadores na Universidade Politécnica de Cataluña desde 1983, a súa investigación céntrase na arquitectura dos computadores e supercomputadores. Publicou aproximadamente 700 artigos, ten colaborado na organización de máis de 300 congresos internacionais, e impartido máis de 700 conferencias. Entre os seus premios, o tres máis importantes a nivel mundial no seu campo: premio Eckert-Mauchly (2007), outorgado polo IEEE-ACM; premio Seymour Cray (2015), outorgado polo IEEE e premio Charles Babbage (2017), outorgado por IEEE.

PUBLICIDADE