Meizu presenta un novo smartphone con pantalla de 6 polgadas

O rival máis directo de Xiaomi, Meizu, tamén quere competir nos terminais de grande tamaño, e así vén de lanzar o Meizu M3 Max, un smartphone con carcasa metálica que cunha pantalla IPS Full HD de 6 polgadas quere gañarse ao público que busca grandes pantallas para unha lectura máis confortable (deixando nun segundo plano a ergonomía do terminal).
Este enorme teléfono funciona cun procesador MediaTek Helio P10 de 8 núcleos a 1,8 GHz, 3 GB de RAM, 64 GB de almacenamento interno (ampliable mediante tarxetas microSD de até 128 GB) cámaras de 13 e 5 Mpíxeles, dobre SIM, lector de pegadas dixitais frontal e unha batería de 4.100 mAh que promete unha longa autonomía (até 9 horas de uso intensivo ou até 10,2 horas de reprodución de vídeo) e carga rápida.
O novo smartphone sae á venda esta mesma semana a un prezo de 1.699 iuans (227,79 euros), e non sería sorprendente que en poucos meses chegue a España a través de cadeas de tendas de telefonía móbil e electrónico de consumo como acontece con outros terminais da compañía (algo no que Meizu ten unha grande vantaxe con respecto a Xiaomi).