Microsoft anuncia o seu meirande investimento en España

luns, 19 de febreiro do 2024 Redacción

Como parte do compromiso de Microsoft para impulsar a innovación dixital e o uso responsable da Intelixencia Artificial (IA) que beneficie ás empresas e as Administracións públicas españolas, a Microsoft prevé cuadriplicar os seus investimentos en infraestrutura de Intelixencia Artificial e Cloud en España durante 2024-2025, até alcanzar os 2.100 millóns de dólares. Isto supón o meirande investimento de Microsoft en España nos seus 37 anos de presenza no Estado.
Microsoft abrirá proximamente unha Rexión Cloud de Centros de Datos ubicada na Comunidade de Madrid, e anunciou a súa intención de construír un Campus de Centros de Datos en Aragón que dará servizo a empresas e entidades públicas europeas. Estas dúas infraestruturas proporcionarán os servizos na nube de Microsoft coas máximas garantías de seguridade, privacidade e soberanía dos datos, e permitirán poñer á disposición de empresas e Administracións públicas españolas e europeas toda a oferta de solucións de Intelixencia Artificial da compañía.
Este compromiso de investimento encádrase no marco de colaboración que estableceron hoxe o presidente do Goberno, Pedro Sánchez, e o presidente de Microsoft, Brad Smith. Microsoft e o Goberno de España traballarán conxuntamente na aplicación da Intelixencia Artificial Responsable na mellora dos servizos ao cidadán, o impulso á innovación baseada en IA, así como no reforzo da ciberseguridade nacional e a ciber-resiliencia das empresas, organismos públicos e infraestruturas críticas españolas.

José Luis Escrivá, ministro de Transformación Dixital; Pedro Sánchez, presidente do Goberno; Brad Smith, presidente de Microsoft Corp.; Carol Ann Browne, xefa de gabinete de Brad Smith; Alberto Granados, presidente de Microsoft en España; e Natalia Escobedo, directora de Sector Público de Microsoft en España

PUBLICIDADE