MixRadio, o servizo de música en streaming agora compatíbel con Android e iOS

Os servizos de música en streaming están a vivir un auxe nos últimos tempos. Máis polo miúdo, MixRadio, un servizo personalizado e de balde, atópase presente en 31 países. Con só premer un botón MixRadio achega un catálogo de millóns de cancións, amais de máis de dez mil mesturas creadas por expertos. Agora, os responsábeis do servizo veñen de lanzalo a unha nova e numerosa audiencia, expandíndose ás plataformas Android e iOS e anunciando un acordo con HTC. A partir deste intre, os usuarios de dispositivos Android e iOS poderán gozar de maneira gratuíta da ampla oferta musical desta radio.
O repertorio musical que achega MixRadio actualízase de xeito continuo co asesoramento de expertos de todo o mundo e as recomendacións de artistas de sona internacional. Salienta o grupo de mesturas do Arenal Sound, onde os amantes do festival poderán escoitar a todos os grupos que estarán presentes este ano, ou rememorar o mellor das edicións pasadas.
Asemade, coa función O meu Mix, os usuarios poderán crear unha canle persoal adaptada aos seus gustos. Tras realizar unha selección de estilos musicais e artistas, MixRadio crea unha playlist específica para ese usuario, que evolúe personalizándose cada vez máis co obxectivo de achegarlle unha experiencia moi personalizada.
Como servizo creado por e para o móbil, MixRadio comprende a importancia dos mixes offline e permite que os usuarios poidan descargar de balde as súas mesturas favoritas para escoitalas sen conexión a Internet, en calquera intre e lugar, sen necesidade de gastar datos.
Alén disto, anúnciase tamén un acordo con HTC, polo cal MixRadio será o provedor exclusivo de contido musical para a aplicación BlinkFeed do fabricante de terminais móbiles, proporcionando novidades personalizadas e adaptadas ao gusto musical dos usuarios.