Movistar permite converter unha SIM en eSIM directamente dende o iPhone

martes, 19 de decembro do 2023 Marcus Fernández

Para facilitar a migración de tarxetas SIM físicas a eSIM o iPhone conta cunha opción de transferencia rápida que permite converter a tarxeta SIM introducida no teléfono directamente en eSIM, sen ter que chamar aos servizo de atención ao cliente da operadora nin ter que acudir a unha tenda para conseguir un código QR para escanear, e en España Movistar (e O2) convértese na primeira compañía en activar esta función que é compatible con smartphones de Apple dende o iPhone Xs.
A función de transferencia rápida é sumamente práctica e de balde, evitando un trámite de expedición de tarxeta eSIM polo que Movistar estaba a cobrar 15 euros (o que provocou grandes críticas).
Aínda que as eSIM xa de por si son unha tecnoloxía chamada a substituír as SIM físicas, a súa implantación está a ser moi lenta e desigual (moitos operadores aínda non as admiten, ou só permiten o seu uso dende certos dispositivos), pero no caso dos iPhone ten un atractivo moi especial, xa que poden combinarse tarxetas eSIM con tarxetas SIM, o que permite empregar 2 números de móbil nun mesmo dispositivo (algo que moitos móbiles con Android permiten con tarxetas físicas dende hai unha chea de anos).

PUBLICIDADE