Mundos Dixitais acolle a presentación dun conto emocional para trebellos baseado no estudo dos acenos faciais
venres, 6 de xullo do 2012
Comezou esta semana na Coruña un dos festivais máis
prestixiosos da animación (e da innovación ligada ao audiovisual) do panorama
galego, estatal e europeo. Falamos de Mundos Dixitais, unha cita á que non poden faltar os seareiros das realidades virtuais e
do cinema que busca explorar e adiantar o que verán os nosos ollos o día de
mañá. O evento, que se vai prolongar até este sábado, dá acubillo este venres a unha importante
xeira de novidades e presentacións. Entre as máis destacas e que máis nos
collen de preto está a que vén da man da empresa galega Moonbite Games e do centro vigués Gradiant. Xuntos deron a coñecer o que será o primeiro
conto emocional para dispositivos móbiles baseado en análises de expresións
faciais.
Este conto, informan os seus responsábeis, abrangue dúas
partes principais: unha primeira, narrativa en sentido estrito, cos seus personaxes e animacións, e unha segunda que
constitúe un módulo de estudo emocional
que é quen de interpretar os acenos e as expresións do lector en tempo real. “Ao
igual que en Dungeons & Dragons”, sinalan Gradiant e Moonbite, “preténdese
implicar ao máximo ao neno na historia, dotando ao conto da capacidade de
reaccionar ante as emocións do lector e que isto inflúa na propia aventura,
deste xeito a historia, ou o seu final, poderá mudar en función das reaccións do lector”. Polo tanto, engaden, a propia ficción poderá dicirlle ao lector
que amose unha determinada expresión (por exemplo de alporizamento á hora de
derrotar ao dragón) ou que imite os acenos do heroe para “pasar de páxina e
continuar coa aventura”.
As opcións e potencialidades de uso son, a xuízo dos
promotores/desenvolvedores da iniciativa, infinitas dependendo das historias.
En opinión de Gradiant e Moonbite, este tipo de conta axudará a reforzar a
aprendizaxe en nenos con autismo e outros problemas de capacidade e
desenvolvemento emocional, amais de ser unha ferramenta lúdica.