Nace e-SoundWay, ferramenta educativa para dominar o inglés a través da Ruta Xacobea

Imaxe de arquivo de peregrinos no Obradoiro. FOTO: Santi Alvite

A USC compartiu detalles do xogo serio e-SoundWay, proposta innovadora para a ensinanza e aprendizaxe da fonética e da pronunciación do inglés a través da experiencia do Camiño de Santiago. Permite profundar, ao longo de 34 etapas con retos e pequenos xogos, en lugares, datos históricos, lendas do Camiño, ou peregrinos e peregrinas de distintas épocas que contribúen a que a persoa usuaria se familiarice con diversos acentos do inglés. Inclúe un manual trilingüe, un laboratorio multimedia en liña e un código QR con acceso a dúas versións do xogo: The Route e FreeRoaming.
O proxecto no que participa a profesora da USC María de los Ángeles Gómez González nace arredor da Ruta Xacobea, concibido “como un espazo simbólico e cultural que combina tradición e innovación”.
Neste marco, e-SoundWay procura poñer en valor o patrimonio inmaterial do Camiño, achegando o ensino da pronunciación do inglés a través de escenarios inspirados no Camiño Francés. Esta iniciativa diríxese principalmente a estudantes españois de inglés como lingua estranxeira, desde o ensino secundario ata o universitario, “pero resulta igualmente útil para calquera persoa interesada en mellorar a súa pronunciación de maneira lúdica e interactiva”, explica a profesora Gómez González.
Ademais do acompañamento de Patience, a guía do Camiño, a aplicación incorpora a participación de peregrinos e especialistas contemporáneos de prestixio (como Antón Pombo, Laurie Dennett, Kate Long, Rebekah Scott ou Noel Braun) xunto coa inclusión de figuras históricas e lendarias vencelladas á tradición xacobea, entre elas John Rutherford, George Borrow, Annette Meaking, Margery Kempe, Andrew Boorde, James Francis Edward Stewart, San Godric de Finchale, Walter Starkie ou o anónimo de Purchas, “cuxas voces e textos cobran vida na experiencia”, informou a USC, engadindo que esta combinación permite que as persoas xogadoras, ademais de perfeccionar a súa pronunciación e ampliar o seu coñecemento da fonética inglesa, vexan a dimensión cultural do Camiño, todo iso da man dos avatares e acompañado de imaxes orixinais tomadas nos lugares reais. Estes e outros aspectos desenvólvense con detalle no manual de e-SoundWay.
Ademais de propor retos de percepción e comprensión de sons, así como actividades de pronunciación, transcrición e escritura, a ferramenta incorpora as principais variedades do inglés internacional (británica, americana e certas particularidades doutras variantes). A idea foi que e-SoundWay ofrecera “modelos de pronunciación diversos e realistas, o que contribúe a ampliar a competencia intercultural e a mellorar a intelixibilidade en contextos globais”, avanza a USC.