Naturgy instala na súa rede sistemas de vixilancia capaces de previr incendios forestais

UFD, a distribuidora eléctrica do grupo de orixe galega Naturgy, comezou a despregar en España a súa solución Fire Detection para anticipar a detección de incendios e preservar do lume grandes masas forestais. Farao mediante un sistema que aplica a Intelixencia artificial a través da análise de imaxes e datos tomados por cámaras instaladas en torres e tendidos eléctricos.
UFD habilitará nunha primeira fase 20 dispositivos que cubrirán unha área de aproximadamente 430 km² na Reserva da Biosfera Transfronteriza Gerês-Xurés, na provincia de Ourense (Galicia), un espazo natural de alto valor ecolóxico. O grupo estenderá nunha segunda fase a instalación destes dispositivos a outras áreas xeográficas.
A operadora eléctrica explica, máis en detalle, que Fire Detection é “un sistema baseado na plataforma Onesait Phygital Edge de Minsait con capacidade para detectar de xeito anticipado e con total fiabilidade posíbeis incendios en grandes extensións de vexetación, mesmo en zonas de difícil acceso, grazas a unha vixilancia 360.º.
A través de algoritmos de Intelixencia Artificial, esta ferramenta analiza e extrae en tempo real información das imaxes obtidas nas cámaras situadas nas torres de alto e media tensión e identifica indicios de lume e fume nun alcance de dous quilómetros. Unha vez que detecta estes sinais, o sistema transmite alertas a un centro de control para activar os protocolos de avisos aos servizos de emerxencia e extinción. Ademais, o sistema incorpora sensores IoT (Internet of Things) que axudan a reducir o que UFD cualifica de “falsos positivos”, e tamén contribúen a optimizar os recursos enerxéticos almacenados. Estes sensores miden a temperatura, humidade e presión atmosférica para evitar tomar imaxes en condicións meteorolóxicas incompatíbeis co risco de incendios e potenciar a súa captura cando existe unha alta probabilidade de que se produza o lume.
Fire Detection tamén permite albergar algoritmos para facer monitoraxe do estado das propias torres eléctricas, avaliar o comportamento das infraestruturas en condicións meteorolóxicas extremas ou detectar incursións en zonas restrinxidas por seguridade.
O sistema foi premiado nos enerTIC Awards 2021 polo seu carácter innovador na procura de solucións para a protección do medio ambiente a través da dixitalización e a eficiencia enerxética.