Novas unidades SSD de Western Digital para xogadores

De cara ao público xogador Western Digital está a ampliar a súa liña de produtos WD_BLACK coas novas unidades SSD SN850X e P40 Game Drive, ofrecendo así máis opcións para ampliar o almacenamento do PC ou da consola de videoxogos.
Estas unidades de estado sólido sairán á venda no verán, sendo especialmente relevantes as SN850X, pois estamos ante unidades PCIe Gen4 con velocidades de lectura de até 7.300 MB/seg., que no caso de ordenadores persoais con Windows poden aproveitar a aplicación Game Mode 2.0 que permite desbloquear características para aproveitar as capacidades destas unidades en xogos e na realización de streaming. No caso das unidades de 1 e 2 TB é posible facerse cun modelo con disipador (o que permite manter un rendemento máximo en todo momento). Estas novas unidades chegarán en capacidades de 1, 2 e 4 TB, cun prezo de saída de 189,99 dólares.
Os que prefiran optar por unidades externas teñen a unidade SSD P40 Game Drive, que chega con conectividade USB 3.2 ten velocidades de lectura de até 2.000 MB/seg., e ofrecerase en capacidades de 500 GB, 1 TB e 2 TB con prezos que parten dos 119,99 dólares.
Cómpre salientar que, mentres estas unidades non chegan ao mercado, xa temos as WD_BLACK P50 Game Drive SSD en tamaños de 500 GB, 1 TB, 2 TB e 4 TB a 139,99, 229,99, 399,99 e 840,99 euros respectivamente, mentres que as unidades internas WD_BLACK SN850 (cunha velocidade de lectura de 7.000 MB/seg.) están dispoñibles en capacidades de 500 GB, 1 TB e 2 TB por 99,99, 169,99 e 322,99 euros respectivamente sen disipador e 117,99, 194,99 e 347,99 euros respectivamente con disipador integrado, sendo estas últimas as recomendadas para a súa instalación en consolas PlayStation 5.