Novo sensor de 410 Mpíxeles de Canon

Canon anunciou hoxe que desenvolveu un sensor CMOS con 410 megapíxeles (24.592 x 16.704 píxeles), o maior número de píxeles conseguido ata agora nun sensor de formato completo de 35 mm, que poderase ver a finais de mes en San Francisco no marco da feria SPIE Photonics West. Pretenden que este sensor se utilice en aplicacións que requiran unha resolución extrema en diversos mercados, incluíndo a vixilancia, a medicina e a industria.
O novo sensor CMOS presenta unha resolución equivalente a 24K, o que permite recortar calquera parte da imaxe capturada por este sensor e ampliala significativamente mantendo unha alta resolución e mantendo o sensor no tamaño full frame, sen dar o salto a formato medio ou superior.
O novo sensor emprega unha formación apiada retroiluminada na que o segmento de píxeles e o segmento de procesamento de sinais están intercalados, ademais de incluír un patrón de circuítos redeseñado. Como resultado, o sensor é capaz de conseguir unha velocidade de procesamento de datos superalta de 3.280 megapíxeles por segundo, ofrecendo vídeo a 8 fotogramas por segundo.
Este sensor tamén conta cunha función de binning de catro píxeles, que trata virtualmente catro píxeles adxacentes como un só, mellorando así a sensibilidade e permitindo capturar imaxes máis luminosas. Cando esta función está activada, o sensor pode capturar vídeo de 100 megapíxeles a 24 fotogramas por segundo.