Nueva Pescanova avanza na súa transformación da man de Telefónica e HPE

mércores, 14 de setembro do 2022 S. P.

O Grupo Nuevo Pescanova, Telefónica España e Hewlett Packard Enterprise (NYSE: HPE) traballarán conxuntamente para avanzar no proceso de transformación dixital da empresa galega, referente no ámbito da pesca, o cultivo, a elaboración e a comercialización de produtos do mar. En concreto, o acordo contempla a centralización da información do grupo pesqueiro e a homoxeneización das súas plataformas tecnolóxicas nos diferentes países nos que opera. O obxectivo é conseguir que Pescanova conte cunha contorna compartida coa que mellorará a seguridade, o control e a xestión da súa información e gañará en termos de eficiencia e produtividade.
Segundo explicaron, a alianza aposta por un modelo de co-localización que busca optimizar o rendemento das infraestruturas dixitais do grupo e que “será fundamental para a interconexión de todas as súas sedes”.
Telefónica España encargarase do deseño deste sistema, albergando nas súas instalacións de Madrid o centro de procesamento de datos da multinacional galega e xestionando as solucións de conectividade e seguridade do proxecto. “Isto permitirá que os equipos de TI do grupo poidan centrar o seu traballo en labores de alto valor engadido e terá un impacto positivo en materia de sustentabilidade ambiental”, informou a operadora.
Pola súa banda, HPE baseou a súa proposta tecnolóxica en HPE GreenLake, que ofrece, baixo unha única plataforma na nube e nun modelo híbrido, aumentar a produtividade do departamento de Tecnoloxías da Información da compañía pesqueira con seguridade, resiliencia e unha maior eficiencia enerxética. O modelo de consumo de tecnoloxía proposto por HPE axuda a promover a sustentabilidade na tecnoloxía, “eliminando o aprovisionamento excesivo, facilitando a adaptación das infraestruturas tecnolóxicas en función das necesidades e facendo posíbel a recuperación de activos ao final do seu uso”, explicou a empresa tecnolóxica.
Así mesmo, Telefónica España e HPE desenvolverán conxuntamente novas solucións no ámbito da seguridade, a integración na nube e a mellora da usabilidade do ERP do grupo e xestionarán toda a rede de datos e comunicacións fixas da multinacional, co resultado final dunha homoxenización e estandarización das sedes da compañía en todo o mundo, aínda contemplando as casuísticas e particularidades de cada país.
O acordo foi ratificado durante un encontro celebrado na sede central de Telefónica en Madrid entre o director executivo (CEO) do Grupo Nueva Pescanova, Ignacio González, o presidente de Telefónica España, Emilio Gayo, e o presidente de HPE no sur de Europa, José María de la Torre.

PUBLICIDADE