O CCG e a RAG soben á Rede o epistolario de Emilia Pardo Bazán
mércores, 12 de maio do 2021
Na
data significativa deste 12 de maio, cando se cumpre un século do
pasamento da novelista galega Emilia Pardo Bazán, o
Consello da Cultura Galega vén de subir á Rede o seu epistolario,
grazas ao convenio asinado coa Real Academia Galega. Son 156
cartas enviadas e recibidas entre os anos 1879 e 1917 a diferentes
interlocutores, como a súa amiga e comadre Carmen Miranda Armada;
Eduardo Pondal; Marcelino Dafonte, director de La Voz de Galicia,
José Alguero Penedo, notario de Betanzos e artista que colabora no
deseño e decoración figurativa na construción das Torres de
Meirás.
O
epistolario preséntase no marco dun especial online que
concentra máis información sobre a escritora galega, unha destacada
precursora das correntes feministas actuais que foi, en palabras do
CCG, “unha muller polémica, criticada e a un tempo tamén
respectada intelectual”.
A
correspondencia de Emilia Pardo Bazán que vén de subirse á Rede
repousaba nos arquivos da Real Academia Galega ata o pasado mes de
febreiro. No mesmo día en que se presentou unha nova edición do
congreso internacional dedicado á súa figura, Rosario Álvarez,
presidenta do Consello da Cultura Galega, e Víctor Freixanes,
presidente da Real Academia Galega (entidade depositaria do seu
legado), asinaron un convenio que permitía a dixitalización e posta
a disposición pública “da face máis íntima Emilia Pardo Bazán”.
O
fondo epistolar dixitalizado consta de 156 cartas enviadas e
recibidas entre os anos 1879 e 1917 con diferentes interlocutores. O
núcleo central está composto por 87 cartas dirixidas á súa amiga
e comadre Carmen Miranda Armada, que segundo lembra o Consello da
Cultura, “permiten explorar o universo íntimo da escritora, no que
fala da morte de seu pai, de como é a súa vida en París ou Madrid
ou das súas continuadas viaxes”.