O Clúster da Lousa renova a páxina de seu e lánzase ás redes sociais
mércores, 14 de setembro do 2016
O Clúster
da Lousa de Galicia (Clúster da Pizarra) vén de renovar a
súa páxina web, agora “máis sinxela e práctica” de
empregar e, tamén, cunha información máis ampla sobre o pasado, o
presente e o futuro do sector na nosa terra. A actualización da
páxina insírese nunha aposta firme do Clúster a prol das novas
tecnoloxías e as novas canles de comunicación, liña
na que tamén cómpre encadrar os seus recentemente activados sitios
nas redes sociais Facebook e Twitter.
Volvendo á remodelación da web, un dos cambios
fundamentais ten que ver coa marxe de uso da mesma en relación cos
diferentes dispositivos. Esta marxe ampliouse para mellorar ao máximo
a experiencia do visitante dende calquera equipamento (computador,
tableta, dispositivo intelixente) e tirando partido de calquera
sistema operativo.
A páxina, de feito, é quen de recoñecer o tamaño
da pantalla (responsive) na que se está a visualizar,
axustando de maneira automática a súa estrutura a cada formato.
Polo que respecta aos contidos, achega “a máis ampla información
sobre as características técnicas da lousa, os seus usos e as
firmas que traballan na nosa terra arredor dela”. Asemade, fornece
información actual do sector, con novas e publicacións editadas
pola devandita organización e, tamén, a posibilidade de aclarar
dúbidas e consultas por parte dos internautas (a través dun
formulario de contacto).
A páxina de inicio amosa un menú con cinco
apartados. Estas sección son: lousa, empresas, perfil do
contratante, colocación de lousa, noticias e publicacións. A web
está encamiñada a diferentes perfís de usuarios, dende socios,
empresas, profesionais, clientes, usuarios até o público en xeral.