O Concurso de Proxectos Tecnolóxicos fai entrega dos seus premios

O Concurso de Proxectos Tecnolóxicos que organiza Expourense cada ano para vencellar a investigación das universidades co mundo empresarial, xa ten gañadores; trátase de Jorge Breogán López, un alumno da Escola Superior de Enxeñaría Informática de Ourense, que se fixo co primeiro premio na modalidade de grao medio, e de Brais Candela, da Universidade da Coruña que gañou no apartado de grao superior.
Ao certame, que este ano celebrou a súa IX edición, presentáronse un total de 14 proxectos (tres para o grao medio e 11 para o superior), e dos seis finalistas do certame catro estudan na Universidade de Vigo.
Jorge Breogán López presentou ao certame o seu proxecto fin de carreira, unha ferramenta informática chamada XAS: Sistema de autenticación extensible con acceso dinámico e restricións que, en palabras do informático, “trátase dun sistema destinado a grandes organizacións, especialmente centros de ensino, que permite controlar o acceso aos ordenadores do centro”.
Brais Cancela, gañador do certame na modalidade de grao superior, presentou ao concurso un traballo titulado: Utilización de modelos deformables para a localización do camiño mínimo: aplicación sobre imaxes oculares. O estudante explica que esta ferramenta “é capaz de detectar o índice arteriovenoso” e vaise integrar nunha plataforma xa existente e utilizada en centros de saúde para detectar enfermidades oculares. Segundo afirma Cancela, “a aplicación xa existía pero tiña unha marxe de acertos do 85%”. “A miña proposta”, engade, “é unha mellora aos servizos que ofrece esa aplicación”, conclúe o informático.
O segundo posto no grao medio foi para Maite Molinos, estudante da Escola Superior de Enxeñaría de Informática de Ourense, que presentou ao certame un sistema móbil que permite obter e consultar as notas académicas por Bluetooth e transmitilas de maneira doada aos interesados. José Manuel Villar, tamén da ESEI, fíxose co terceiro posto do grao medio por un proxecto que axuda aos novos empresarios a encontrar a mellor ubicación para o seu negocio nunha cidade ou nun determinado espazo xeográfico. E Enrique Sánchez, da Escola Técnica Superior de Enxeñeiros de Telecomunicación de Vigo, levou o terceiro premio na modalidade de grao superior por unha aplicación que se pode utilizar en sectores como a publicidade ou os sistemas de seguridade e que permite ao usuario interaccionar cun moneco xerado por ordenador. O segundo clasificado na modalidade de grao superior foi o estudante da Universidade da Coruña, Xurxo Méndez cun xogo para dispositivos móbiles baseado en GPS.<br A deliberación do xurado e o acto de entrega de premios tivo lugar este xoves en Expourense
O Concurso de Proxectos Tecnolóxicos é un certame organizado por Expourense co obxectivo de vencellar a investigación que se fai nas universidades co mundo empresarial, sensibilizando á empresa do que lle pode achegar a aplicación da investigación tecnolóxica para o aumento da produtividade e da competitividade.