O EC3 expuxo en Compostela as principais ameazas ás que se enfronta a loita internacional contra o cibercrime
mércores, 30 de outubro do 2013
As Xornadas de
Informática Xudicial que organizou
en Santiago o CPETIG serviron entre outras
cousas para pór de relevo un paso necesario na loita contra o
cibercrime: é preciso afondar na colaboración internacional para
combater a proliferación de delitos relacionados coas novas
tecnoloxías. Ou sexa, os fraudes en calquera das moitas modalidades,
o acoso a nenos e adolescentes, as intrusións e suplantacións, os
ataques a servidores, etc. Este de facer unha fronte común
transfronteiriza semella ser un dos grandes obxectivos do Centro
Europeo contra o Cibercrime (EC3), entidade
integrada na Europol e emprazada en Holanda e cuxo responsábel de
implantación, o galego Manuel Álvarez Sobredo, participou nas
devanditas xornadas do CPETIG amosando a actividade do centro e, de
paso, lembrándonos que Internet é unha fonte de información e
comunicación revolucionaria, pero cómpre que sexamos conscientes
dos seus ricos (non tanto da propia Rede en si mesma como no que se
refire a quen anda nela). Ao
seu xuízo, cómpre que nos preparemos para máis ameazas e dende
máis países.
En
Código Cero tivemos a oportunidade de falar con Álvarez Sobredo e a
nosa conversa xirou por unha banda arredor da natureza do dito EC3 e
do cometido do relator
neste centro, un espazo de traballo internacional que amais de loitar
contra o cibercrime, diríxese a botar abaixo os posíbeis atrancos
que poida atopar a cooperación entre países e institucións. Dito
doutra maneira: encamíñase a normalizar este traballo colectivo,
por enriba “de diferenzas, culturas dispares, desconfianzas,
posíbeis reticencias”, sinala. Álvarez Sobredo, en certa maneira,
opera no EC3 como factor de cohesión. En primeiro lugar, pola súa
longa experiencia internacional e, en segundo lugar, polas ligazóns
co seu país de orixe. Resultado: a relación do centro cos corpos
policiais españois só pode cualificarse de boa.
- Álvarez Sobredo, á dereita, durante a mesa redonda das xornadas do CPETIG
O
EC3, cuxo cometido é investigar e resolver delitos serios que
impliquen a varios países (fraudes, acoso infantil, intrusións),
ten no punto de mira un tipo de crimes en claro espallamento. Segundo
nos contou o relator, “o medre das novas tecnoloxías da
información e a comunicación está a cambiar a vida policial, en
certa maneira do mesmo xeito que a proliferación do narcotráfico
nos anos oitenta mudou para sempre o noso xeito de traballar”.
Daquela, dixo unha boa parte dos crimes a investigar estaba
relacionada coas drogas, hoxe son os roubos na Rede ou as redes de
pornografía infantil o que centra os devanditos esforzos. Álvarez
Sobredo lembrou que ao problema de que unha boa parte de actividade
delitiva se tivese envorcado na Rede cómpre engadir outro problema a
ter moi en conta: que en breve engadiranse ás redes da
cibercriminalidade os países en vieiros de desenvolvemento a onde a
Interne non chegou aínda de xeito masivo, pero chegará a medio
prazo. “Até o de agora”, dixo, “o noso traballo céntrase
sobre todo no primeiro mundo, que é o que ten arestora unha ampla
taxa de penetración TIC, pero que pasará cando se incorporen á
Sociedade da Información a longa listaxe de países de Asia ou
África que aínda non o fixeron, países onde existen regulamentos
febles para combater este tipo de delitos ou pórlles freo?”,
preguntouse. Na súa opinión, o que vai acontecer será unha
proliferación aínda máis acelerada de ameazas, ataques e
intrusións, tanto no que se refire á Internet como a dispositivos
diversos. Con todo, aínda hai outro gran problema a resolver,
recoñeceu. “Trátase do problema da ausencia de denuncias
relacionadas coa cibercriminalidade, só unha pequena parte deste
tipo de delitos se denuncia”.
O
relator
Álvarez
Sobredo foi
dende
maio de 2005 xefe de Recursos Humanos de Europol e dende setembro de
2012, responsábel do equipo de implementación do EC3. Lembrar
que este centro entrou en funcionamento este mesmo ano, co fin de
contribuír a protexer ás empresas e aos cidadáns europeos fronte á
ciberdelincuencia e garantir unha Internet libre, aberta e segura.
Entre as súas principais liñas de investigación e actividade
figuran os fraudes en liña, os abusos de menores levados a cabo a
través das redes e outros delitos informáticos que afectan con
frecuencia a centos de vítimas de xeito simultáneo e implican a
sospeitosos en diversas partes do mundo. O centro, polo tanto, ten
vontade de chegar a onde sería difícil chegar sen o un
alicerce internacional firme.
De feito, moi poucas operacións contra este tipo de delincuencia se
poden levar a bo termo coa única participación dos efectivos das
policías nacionais. A estratexia
do EC3 céntrase nas
actividades ilegais en liña das bandas de delincuencia organizada,
especialmente nos ataques dirixidos contra as operacións bancarias e
outras actividades financeiras en liña, a explotación sexual
infantil en liña e os delitos que afecten as infraestruturas
críticas e aos sistemas de información na UE.
Como
dixemos, Álvarez Sobredo está a fronte da implementación do novo
Centro Europeo para o Ciberdelito (EC3-European
Cybercrime Centre).
Malia todo, el mesmo confírmanos nunha comunicación previa ás
xornadas do CPETIG que a súa experiencia non é tan centrada neste
tipo de criminalidade como na xestión de proxectos. Entre estes
proxectos, por certo, atópase por exemplo o da formación do persoal
de seguridade dos Xogos Olímpicos de Barcelona 92. De formación,
Álvarez Sobredo é policía e psicólogo de organización. Ademais
de destinos operativos, traballou nos gabinetes da Secretaría de
Estado para a Seguridade e do Director Xeral da Policía (neste
último durante moitos anos, como director do Instituto de Estudos de
Policía, do que dependían as revistas profesionais, das que tamén
foi director). A principios do 2000 recalou por primeira vez na
Europol “como experto nacional para dirixir o proxecto Eurorisk que
durante 2 anos e medio coordinou as actuacións para a seguridade da
introdución do euro, que foi o aspecto máis destacado da
presidencia española do primeiro semestre de 2002”, coméntanos.
“A principios de 2005 incorporeime a Europol como director de
Recursos Humanos, actividade desenvolvida durante case 8 anos”,
engade. Logo, cando o Consello da UE aprobou a proposta da Comisión
de crear un Centro Europeo para o Ciberdelito, foi quen de ver o
potencial enorme do proxecto durante os dous últimos anos de
contrato con Europol. “Como a xestión do persoal xa se converteu
en algo rutineiro, solicitei ao meu director a adscrición ao
proxecto e aquí estou”, explícanos. O
relator, que confesa a súa ledicia por volver a Santiago, fará
fincapé durante as xornadas do CPETIG na importancia de establecer
máis e mellor ligazóns de colaboración entre os eidos públicos e
privados para loitar contra o cibercrime, e tamén entre uns países
e outros, entre unhas institucións policiais e xudiciais e outras.
Amais disto, avánzanos, a solución para atallar do mellor xeito
posíbel o crecemento deste tipo de actividades de delito pasa pola
concienciación, a sensibilización da cidadanía (usuarios,
provedores de Internet, entidades públicas), a ciberproteción e a
persecución efectiva dos criminais.